民主派喺區議會選舉取得85%議席，今年9月立會選舉入面、由區議員互選嘅區議會第一（區一）功能界別議席，基本上可以肯定係民主派嘅囊中之物，之前已經有好多素人表態想去選，連喺網上人氣極高、好多連登仔支持嘅東區區議員仇栩欣，亦傳出佢想去選。
八方於是問仇栩欣係咪有意去馬？佢就話仲考慮中，又認為自己可以團結政黨同素人，平衡雙方利益，形容自己係雙方「最大公因數」，不過佢就拒絕評論其他有意出選嘅素人，但都話會積極參與協調工作。其實區議會第一功能界別議席競爭都好激烈，八方數吓手指，最少有八、九個民主派區議員舉咗手有意出戰，雖然話民主同非建制佔咗呢個界別八成以上選民，但係都要協調得好或搞吓初選，否則成八、九個民主派出嚟報名參選，將啲票分散晒，隨時又變攬炒。