鄭敬基，入行34年的歌手、哥哥的鐵粉、不獲無綫續約的黃色藝人，「今日唱《有誰共鳴》，呢隻歌特別送畀手足，記得銅鑼灣好亂時，我放緊狗，呢首歌喺我腦裏響起，哥哥嘅歌畀到我鼓勵，希望都鼓勵到大家。」
「1982年去到加拿大讀書，16歲，收到音樂盒帶《一片痴》，一聽已經被打動，一個人喺加拿大讀書，好lonely，當時唔係好聽廣東歌，直至聽到呢首，好記得封套哥哥着踢死兔，感覺把聲好安慰、好抒情，好似同你傾偈，由嗰時開始入咗血，所有嘢都鍾意佢。1984年參加歌唱比賽，嗰時唔知點解，好揀唔揀，揀咗校長（譚詠麟）嘅歌《傲骨》同《幻影》，贏咗，唉！」之後返港試音，1986年入行做歌手。
一直追隨哥哥的鄭敬基，《不羈的風》、《少女心事》合埋眼都識背，但卻背叛了哥哥，「好記得嗰時我入行係風雲樂隊，經理人就住市場學，要我做咗件好違背自己嘅事，可以咁講，嗰時我未夠成熟，只係覺得希望能夠幫到事業就得，當時經理人叫我唔好同人講鍾意張國榮，要講鍾意校長，嗰時哥哥同校長兩班fans鬥得好犀利，經理人話如果我講鍾意哥哥，好多人會唔鍾意我，為咗呢個原因，我話偶像係校長，我真係唔係，我真係哥哥嘅鐵粉，好鍾意呢個藝人，好尊敬佢，好有魅力。」
哥哥要求贈畫
1993年，鄭敬基有機會跟哥哥合作拍電影《白髮魔女傳》，雖然只有幾日戲，他好開心，「同哥哥一齊，正呀，哥哥原來係好準時嘅人，我早佢一場，我等緊嘅時候，喺枱面畫畫畫，原來哥哥喺我背面：『你畫緊乜嘢？』我有心跳感覺，雖然哥哥係男仔，『冇呀，我亂畫。』佢睇咗一陣，『可唔可以畫張畀我？』我好含蓄：『你想要幾大？』佢用手勢示意，『咁啦』呢個度我仲記得，正方形。」
用兩日時間，鄭敬基畫了一張抽象畫，「我諗哥哥係點，食支煙都有型過人，佢多重性格，總之諗到乜就畫，我畀咗佢之後，時間過去，拍到最後一日，佢望住我：『你畫畀我幅畫，我掛咗喺房。』吓，佢真係會咁做，嗰時覺得好開心。」哥哥已經不在，但那幅畫仍永記鄭敬基心中，多年沒畫畫的他，這天重拾筆桿重畫當年送給哥哥的畫作，「好多謝哥哥畀我每一個感覺，以前覺得做藝人，唔好畀人感覺似佢，但𠵱家覺得，我唱歌有少少你嘅味道，係我一生嘅榮幸。」
片場哼主題曲
「有啲人係口痕口爽，但哥哥好細心同我交流，嗰日佢寫咗《白》片主題曲（《紅顏白髮》），哼畀我聽，問我好唔好聽。嗰日拍最後一日，我畀青霞姐姐滅門，斬咗隻腳，當時冇咁好特技，搵大膠紙綁住，拍近鏡執燈一個鐘，我隻腳唔郁得，哥哥走埋嚟：『我陪你傾偈啦。』『吓，唔好，有排喎。』佢話唔緊要，哥哥真係好關心人，唔係圓滑嗰啲，佢同我傾足45分鐘，拍時佢攬住我喊：『師弟』，好記得佢眼淚滴落我塊面，呢個係我哋最close嘅接觸，佢盡力幫我入戲，哥哥呢個人真係好好，除咗大家覺得佢好浪漫好型，佢係好『熱』嘅人，呢樣係我好尊敬佢原因。」鄭敬基想到哥哥，湧起無限思念。
當年哥哥離去時正值沙士，今年17周年忌辰，香港卻面對武漢肺炎，「今年因為自己立場加埋疫情，想做演唱會都做唔到，我嘗試喺4月1日開live，表明立場我冇後悔，我由一個唔敢表態鍾意哥哥，到𠵱家我希望哥哥仲喺度，如果可以揀，我寧願返去3月31日，我想同哥哥講：『你記唔記得我？嗰時你好關心我，畀我好大鼓勵。』」
撰文：余燕儀
攝影：仇志德