陳智燊（Jason）同宋熙年之前相繼離開無綫，轉做YouTuber同司儀，前年宋熙年誕下囝囝Damon，家庭事業兩得意。前晚Jason喺Ig貼出一張「一家四口」嘅合照，宣佈就快又做爸爸。
疫情後去好地方
喺全家福中，Jason同囝囝一齊扮豬嘴，Jason用英文寫道：「我真係好幸運，有一個完美嘅家庭賦予我力量，令我做到最好去保護佢哋。𠵱家我哋蒙主祝福，將會有一個新家庭成員加入，佢經常提醒我保持警惕、保持正面，喺呢個艱難時候，我哋需要照顧自己，亦要互相彼此照顧。恭喜我哋嘅Damon BB將會成為大哥，多謝我近排成日留喺屋企嘅可愛老婆。當我哋趕走呢個病毒，我應承會帶你去一個好地方。」大肚婆宋熙年亦有喺Ig貼出一家人嘅合照，同埋用英文宣佈懷有第二胎。
「今次放鬆好多」
宋熙年又特登出Ig story，表揚老公幫手去超市買糧食同日用品，竟然全部買啱，令佢可以安心喺屋企養胎，佢搞笑用英文寫：「啲舖頭遲開早收，真係唔容易。」
對於再次做爸爸，Jason回覆《蘋果》時話：「第二次再做爸爸，好開心，好開心！由於𠵱家疫情好緊張，惟有做好自己，世界各地指引都係留喺屋企，我呢樣都做開，照顧好自己、照顧好屋企。第二胎冇咁擔心，諗番老婆兩年前陀囝囝時，佢陀都冇咁擔心，但我反而唔知點去幫佢照顧佢，今次我反而放鬆咗好多。我哋多啲留喺屋企、買吓餸，照顧老婆，同囝囝玩吓。」
撰文：馮仁昭