【有心人】「他的直率坦蕩個性」

【有心人】「他的直率坦蕩個性」

1986年開始認識張國榮(Leslie),當時都是以Leslie稱呼他,還未有人會叫他「哥哥」,記得2003年4月1日知道他跳樓身亡後,周潤發夫婦當時正身在朱家鼎和鍾楚紅夫妻家晚飯,他們看電視新聞報道都不肯相信這個事實,發嫂打電話來問:「電視賣啲新聞係咪真㗎!」筆者回答:「是!」從電話中已傳來哭泣聲了,可想而知,哥哥的死,對他的朋友造成很大打擊。

筆者和哥哥因工作交往這麼多年,最喜歡是他的直率坦蕩個性,還有赤子之心。記得1989年他尚未宣佈開告別演唱會前,有一天收到他電話,約了晚上去灣仔君悅酒店晚飯,他一坐下來就跟我說:「畀單大新聞你呢!」筆者問:「乜好嘢呀!」他笑笑口說:「幫我寫開完告別演唱會,我會退出娛樂圈,移民加拿大!」當時來說確實是娛樂圈大新聞,但因為熟悉他性格,忍不住勸他一句:「不要講到咁絕,不如只寫退出歌壇吧!留條後路拍電影啦!你性格實姣婆守唔到寡,到時喺加拿大住得悶,你咪死返嚟!」

儘管拍攝賀年照當天阿倫(圖左)遲大到,愛守時的哥哥仍有義氣地完成工作。

學百惠退出

哥哥斬釘截鐵回我:「所以我就要你咁寫,趕絕我,等我唔可以再出返嚟!我想學山口百惠徹底退出!」雖然筆者向他再三表示不相信他做得到,叫他三思,但是他還是很堅持說:「你唔寫我全退,我一樣可以叫其他記者幫我寫,你照我講法寫啦!」

因為知道他年底開完跨年演唱會就移居加拿大,所以向他提出一個要求:「可以同阿倫一齊幫我拍輯春郊試馬為主題的賀年照嗎?明年是馬年。」哥哥對我這個提出是瞪大眼說:「同阿倫一齊影賀年相!你都敢提出嚟!」筆者沒好氣說:「咁你影唔影?」哥哥:「好,就算睇你份上我答應你,佢會唔會肯影?你問下佢先啦,佢肯我咪幫你影囉!」結果筆者問阿倫,他反問:「Leslie應承咗你未?」答他:「你影,佢會應承!」阿倫:「咁好啦!我幫你啦!」

後來告訴哥哥阿倫答應了,他是十分意外說:「佢竟然答應你!」結果約好兩位巨星某日先去雍雅山房午餐,然後再坐車去附近一個馬場拍照。當日哥哥好準時來到,但阿倫就遲遲未見人,等到和哥哥吃完午餐還未出現,哥哥開始有些不高興(因為他很守時,也不喜歡人家不守時),他說:「唔等啦,佢嚟唔到,我哋自己影啦,走啦!」當時心裏已在暗罵阿倫到底搞甚麼一直不見人影,把事情搞禍,怎料車開了幾分鐘發現對頭車是阿倫座駕,立刻跟哥哥說:「阿倫部車喺對面,不如等埋佢啦!都來到!」後來哥哥就叫司機把車駛回去雍雅山房。

阿倫見到哥哥後立刻說對不起,然後解釋因為晨早去了跑步,然後再去弄頭髮所以才會遲到,哥哥聽完解釋沒甚麼表示,大家坐下來閒聊約15分鐘左右,哥哥便說:「我哋快啲上去馬場,好快冇太陽,趕緊上車走啦!」哥哥一向對時間、衣着打扮非常有要求,當時情況,他心中雖然不快,但都合作地完成拍攝,相當有義氣。

學姣婆吹咩

1990年他和唐唐移居加拿大生活,1991年4月21日當晚舉行第10屆香港電影金像獎頒獎禮,當晚宣佈哥哥憑《阿飛正傳》贏得影帝,筆者在報社打電話去加拿大找哥哥,想請他說說得獎感受,問完新聞與他閒聊幾句近況,聽語氣他在加拿大住得挺悶,心裏已估計他很快回港復出。

到11月他果然回來與黃百鳴見面傾談《家有囍事》劇本,知道他肯定復出了,他回來後有次去片場探班,見到他時,哥哥熱情得來個擁抱,我笑他:「都話你姣婆守唔到寡,當年聽我講,咪唔會俾人話你出爾反爾。」哥哥一點不在乎別人說甚麼:「你咪幫我寫,我係姣婆守唔到寡,吹咩!」其實他都是一個敢作敢為的人,坦蕩得可愛,而事實上他復出後吸納了不少新fans,聽他的新fans說過:「我哋係多謝哥哥姣婆守唔到寡,佢肯復出先畀我哋有機會欣賞到佢唱嘅好歌同好電影,佢真係好型仔,又好有才華,如果真係退出咗,係咪太嘥咗佢,咁後生走咗,對我哋係造成好大打擊。」

撰文:鍾國仁