法國前鋒賓施馬，自從爆出以性愛影帶勒索隊友華布拿後，一直俾法國國家隊拒諸門外，之後基奧特就坐正法國隊中鋒位置，前年更加成為世界盃冠軍功臣。最近賓施馬喺個人ig開直播嗰陣，有球迷叫佢比較吓自己同基奧特，呢位皇家馬德里前鋒亦唔客氣，直指兩個人完全唔同班。
賓施馬自從2015年俾人逐出法國隊後，教練迪甘斯就將中鋒重任交畀基奧特，呢位33歲前鋒亦都冇令人失望，佢代表國家隊出戰93場射入39球，成功過咗賓施馬，登上國家隊第三號射手位置，僅次名宿亨利同柏天尼。不過賓施馬就幾唔畀面呢位同鄉，佢ig直播嗰陣話，「你唔會用F1戰車同高卡車比較啩？我明顯就係F1戰車。佢成功係因為佢有好強嘅隊友，又基利安麥巴比又基沙文，然後佢做好自己工作，大家就好讚賞佢嘅踢法。」
皇馬唔使減人工
其實賓施馬又唔使咁嬲，事關𠵱家周圍都減薪嘅時候，佢效力嘅皇馬講明唔使學死敵巴塞隆拿同馬德里體育會咁減人工！𠵱家西甲巴塞同馬體會兩大班霸，甚至愛斯賓奴都要減薪七成，相反皇馬就一路冇聲氣，《馬卡報》就話，原來皇馬前年放走基斯坦奴朗拿度後，球會已經連續四年未蝕過，而且薪酬支出只佔總收入嘅一半，相反巴塞嘅薪酬支出則佔總收入高達八成，令皇馬喺疫情之中仍可維持正常營運唔使減薪裁員。