因武漢肺炎疫情喺全球爆發令世界體壇停擺，影響越嚟越嚴重，紐卡素成為第一間英超球會，要求所有非一隊員工放無薪假，以減少開支。紐卡素員工係喺星期一收到董事總經理查尼嘅電郵，解釋所有非一隊員工開始放無薪假，職員可申請政府成立嘅武漢肺炎職位保留計劃。根據職位保留計劃，申請人可攞到80%人工，每月最高金額為2,500鎊(約24,000港元)。受影響嘅員工包括球探、青年軍教練甚至球會旗下慈善機構員工，消息指非一隊員工要開始放無薪假，主要係因自英超停擺後，球會收入大減，包括損失過百萬鎊嘅主場門票收入。紐卡素咁做，令佢哋成為英超第一間要求員工放無薪假嘅球會，亦同好多球會做法唔同。英冠球會列斯聯早前宣佈，領隊、球員同球會高層暫時唔領薪，以確保球會低層員工繼續有糧出，而西甲巴塞隆拿球員亦減薪七成，以換取球會其他職員有糧出。