因武漢肺炎疫情影響，歐洲多個聯賽都被迫停擺，就算將來重開，預料比賽都會閉門上演。近日德甲球會慕遜加柏球迷就諗到條「絕橋」，打算製作50,000個人形紙牌放喺看台上，令球場回復熱鬧景況。慕遜加柏嘅球迷組織「Fanproject Monchengladbach」（FPMG）上周就提出計劃，製作50,000個球迷形象嘅紙牌放喺觀眾席上，組織表示雖然球迷依舊冇得入場睇波，但就可以令愛隊嘅主場回復昔日嘅熱鬧。據FPMG表示，每個紙牌定價為19歐元（約162港元），而且用料絕不馬虎，為防風同防雨嘅塑膠用料。另外，組織表示扣除員工收入，其餘收益將捐贈畀當地慈善機構，製作紙牌嘅公司亦係喺疫情中被迫結業嘅設計公司，希望可幫到佢哋。