林鄭先來一招禁酒令，雖未實施，已令全港酒吧損失慘重，雞毛鴨血。林鄭見眾怒而縮，話禁酒令不過係建議啫，唔係嚟真嘅，但跟住在3月27日宣佈防疫措施，其中一項於3月28日下午六時開始，即是（a）食肆顧客數目限於座位半數以下；（b）枱與枱之間需保持至少1.5米距離；（c）每枱只限坐4人；（d）除了飲食時間，食肆內員工及食客須戴口罩；（e）食客進店前須量度體溫；（f）食肆須為客人準備搓手液。
（a）（b）（c）三樣嘢已足以殺死本港大部份食肆，實際上難以有效實施，譬如你去威靈頓街麥奀記食雲吞麵，間舖頭咁細，每枱要相隔1.5米，擺得幾多張枱？砵典乍街有間「三多」，平日中午時分門外排長龍入內食麵，味道不過不失，勝在價錢平民化，而此店面積細，舖位窄，點擺枱呀？食肆限制令對會所反而打擊不大，譬如馬會守法到加零一，會所中餐廳擺枱距離多過1.5米，以1.8米為最低標準，大酒店之宴會廳及中餐廳相信亦可如此。
但會所最難逃每枱限四人之負面影響，譬如一家五口就去邊度都唔掂，如肥仔K有三個仔女，由歲半到六歲，一家人去餐廳食早餐都唔得（因與幼童分枱坐並不實際），傳統老店每有卡位之設，照足1.5米限制亦好麻煩。
咁鬼煩，陸羽於是宣佈暫停營業，直至另行通告為止。3月28日下午，左丁山收到陸羽停業消息，為之感嘆不已，問超級常客應流哥：「怎麼辦？」應流哥話十分無奈，佢每日在陸羽打躉，話以後去乜地方好呢？女賓架S姐係陸羽常客第二代，以後可以請左丁山去Bankers' Club食「紅燒豆腐飯炒底」，心領了！餐廳R與我等每星期在陸羽聚餐，已有四十幾年歷史，以後唔知幾時復業，餐廳R當然滿腹牢騷，陸羽茶客不少係生意人、文人雅士、古董收藏家、老牌富豪、隱形富豪之聚腳地，簡直係香港文化史、商業史之一部份，陸羽如以後停業，武漢肺炎係罪魁禍首，林鄭政府之無能，亦要負責任；之後又聽到1928年創業之Jimmy's Kitchen停業，左丁山更加沮喪，Jimmy's係上海西式餐廳之表表者，飽經戰亂風浪，點知今年不敵限枱或限聚令，令左丁山一輩中環人頓然失去集體回憶，唔傷感就假嘅，想當年請外父到占美食餐，佢係要叫碟普通不過之白汁雞皇飯，話在年輕時吃過，印象難忘，今外父已仙遊十幾年，想佢在天亦諗唔到占美今年會在中環消失。
陸羽與Jimmy's Kitchen，一中一西，名震中環及海內外，竟會在林鄭特首任內停業（希望係暫時啦），香港地方志要記上呢一筆！