近排不停接受傳媒訪問嘅警務處長PK鄧，連親共網媒「點新聞」都有興趣，佢早前接受高志森同屈穎妍專訪，全程自吹自擂，呢個洗白訪問帶出嘅小插曲，就係PK鄧自爆做過老臨，1984年演過高志森執導、黃百鳴監製同主演嘅電影《開心鬼》，原來佢唔止做一次茄喱啡，同年底高志森另一套電影《聖誕快樂》，PK鄧一樣有份，不過佢以為咁可以搞公關，結果反而俾杜汶澤、黃秋生寸爆，話佢多咗種陰氣、做茄喱啡好過做差人！
黃秋生︰生咗啲陰氣
《聖誕快樂》有主角麥嘉飾演嘅報館採主，古仔結尾鬧上差館，亦需要較多臨記演出，咁PK鄧究竟當年係扮記者定PoPo？八方金睛火眼重睇過套戲，最終搵唔到PK鄧出現嘅鏡頭，唔排除戲份已被剪走。
PK鄧曾經話佢係睇成龍、方中信學做警察，點知原來佢直情涉足過娛樂圈，圈中人都有迴響，杜汶澤率先喺facebook寸爆佢，除咗笑佢戲屎，仲話佢做茄喱啡好過做差人，同時引用PK鄧講法，「自己無大造文章，亦唔覺得如獲至寶」；黃秋生都出聲，話冇留意過PK鄧演技，同時指對方𠵱家多咗種陰氣，「可能佢嘅職業或者俾人恰得多，自自然生咗呢啲陰氣。」
黃百鳴噚日接受本報訪問時話，對PK鄧做《開心鬼》臨記一啲印象都冇，知道後亦都冇特登睇番，但對於PK鄧話臨記當年一日有700蚊人工好意外。八方搵過當年物價，干燒伊麵只係七蚊碟，即係拍一日戲就已經食到100碟。
李八方