關於巴塞隆拿一班球星願唔願意減薪同球會共度時艱，之前一直有報道話佢哋唔滿意減薪七成嘅方案，但美斯日前就聯同其他隊友一齊發聲明，話願意接受呢個方案，反而喺聲明中暗指有人炒作，想借公眾壓力向球員施壓，甚至唱衰球員。睇嚟呢位之前已經同體育總監艾比度鬧風波嘅阿根廷球王，疫情過後都唔知會唔會真係考慮離開呢個成名地。
尚未續約隨時走人
美斯日前發表嘅聲明，指出球員完全可以理解球會現時受疫情影響之下嘅困境，亦好清楚要企出嚟幫球隊解難，仲話雖然減薪呢個決定花咗成幾日先有定論，但球員一直傾向同意。聲明仲強調，有人別有用心，近日刻意將球員放喺放大鏡中，施加額外壓力，甚至有意唱衰球員，但要澄清嘅係球員一直了解減薪嘅必要。
美斯已經唔係第一次幫球員出頭，今年二月嗰陣，就因為家陣做咗體育總監嘅前隊友艾比度公開斥責球員唔落力想逼走前帥華維迪，搞到佢好嬲，直接叫艾比度唔好單單打打，係就開名講，後尾高層仲特登搵艾比度照肺，但就冇炒呢位前法國國腳，所以搞到美斯同高層關係一直緊張。唔知美斯今次咁講，矛頭又係咪指向艾比度呢？
唔少外國傳媒就對美斯主動為球員平反嘅行徑讚好，法國《隊報》封面甚至將美斯嘅樣套入同樣嚟自阿根廷、古巴革命重要人物哲古華拉嘅肖像入面，指佢作為球隊代表人物同隊長，主動幫球員抱不平還擊管理層，就係巴塞嘅哲古華拉。西班牙傳媒亦推波助瀾，話可以感受到美斯呢份聲明嘅怒火，而且2021年就約滿巴塞嘅佢，一直未同球隊續約，分分鐘會離開。
西甲聯賽死線6.27
另外，因為武漢肺炎疫情仲未受控，西班牙《馬卡報》就報道，西甲賽會雖然已經同各球隊代表開會，大家一致都想完成今個球季，但亦要得到西班牙政府首肯，但如果6月27日前聯賽仍無法重開，咁就可能會取消今個球季。至於歐洲足協（UEFA）周三就會再召開緊急視像會議，邀請55個成員國代表商討尚餘球季嘅解決方案，包括歐聯賽事仲有冇機會進行，而且亦會就球季一度要延遲，傾吓球員合約以及轉會市場係咪需要因應情況調整。