全球球壇都接近處於停擺狀態，大部份足球比賽都停晒。冇波開即係冇波賭，香港足智彩自從喺2星期前3月23日嘅澳職之後，就一直再冇比賽受注。鍾意賭波嘅球迷，餓咗兩星期之後仍然等待緊，撳吓足智彩網頁，發現「暫定受注球賽」賽程上，喺今個星期五居然有墨超同埋智甲等賽事可以投注。不過大家不妨睇定啲先，喺全球疫情咁嚴峻下，各地聯賽都會好審慎處理聯賽重開事宜，據悉其中墨超方面仲研究緊喺五月開番嘅可能性，要好似《賭博默示錄》主角開司咁乜都玩下，大家不妨等多陣，遲啲留意本報重出江湖嘅二線波攻略。
墨超、智甲乜都有
睇吓足智彩個網頁，喺「暫定受注球賽」賽程度，周五有兩場墨超聯賽上演，到周六仲精采，除咗墨超之外仲有韓職，到下周日連智利甲組聯賽都加入戰團。睇埋下周三，仲有歐洲主流聯賽之一嘅荷甲，喺周四凌晨有場阿爾克馬爾主場對飛燕諾嘅比賽有得投注。係咪真係咁豐富？恐怕都只係畀大家參考下。
韓職開完會重開無期
韓職代表啱啱喺周一同當地足總高層開會，喺目前抗疫形勢唔明朗下，會考慮將2020年球季賽程縮短，但仍然未有共識幾時可以開番波。至於墨超聯賽方面，完成咗3月中第10輪聯賽之後，賽後宣佈暫停賽事，不過喺聯賽官網上面，賽程表上見到第11輪賽事暫停，到第12輪就仲喺度，一共9場比賽由4月3日踢到5日。根據當地喺上星期嘅消息，各球隊班主目前仍然研究緊可以幾時重開，暫時各方面得出嘅初步共識，係最快要到五月中先可以重開，目標係喺六月尾之前，完成晒剩返嘅比賽。由於墨超設有季後賽爭冠賽制，目前聯賽得番七輪，佢哋希望可以喺六月初完成，馬上進行季後賽，喺6月25同28日上演總決賽首次回合，決出今屆冠軍。不過可唔可以成事，又係要睇疫情情況。
智甲聯賽方面，今季聯賽暫時只係進行咗七輪比賽，同墨超一樣踢完3月中嗰輪之後賽會就宣佈暫停。當地足總表示目前並冇聯賽重開嘅時間表，因為近期疫情一日比一日嚴重，只可以繼續觀望。荷蘭聯賽方面，聯賽賽會喺上月20日宣佈將荷甲、乙等比賽暫停到至少4月6日，日前更新消息提出咗三個點樣處理餘下比賽嘅方案，預計會喺未來幾日有最新宣佈。