日職球會神戶勝利船周一宣佈，隊中後衞酒井高德（圖）對武漢肺炎嘅檢測呈陽性反應，成為日職首位「中招」球員。神戶勝利船表示，酒井高德喺上星期三開始發燒，所以冇出席第二日嘅操練，去咗兵庫縣嘅醫院求診，當時佢被診斷係患上急性氣管炎。不過及後幾日酒井高德仲係咁發燒、頭痛同喉嚨痛，周一接受測試後證實對武漢肺炎呈陽性反應。球會表示未有其他職球員出現武漢肺炎或感冒嘅症狀，不過球會都會按照衞生部門指示將訓練場所消毒，又會密切留意所有同酒井高德有過緊密接觸嘅職球員嘅身體狀況。
酒井本月中曾經去前日本國腳加地亮喺大阪箕面市開設嘅CAZI Cafe食嘢，嗰間都係相當受大阪飛腳球迷歡迎嘅餐廳，唔知當地會唔會因酒井高德確診而爆發新一輪疫情，令原本喺5月9日重開嘅日職再添不明朗因素。