為免群眾聚集傳播武肺，唔少名人同球星都呼籲大家留喺屋企，阿士東維拉中場基亞利殊（圖）上周六就拍過片叫人唔好出街，點知周日就有人發現佢喺街，仲牽涉一單交通意外。話說伯明翰郊區周日朝早發生車禍，一架白色Range Rover撞向另外兩架停泊緊嘅車，據報當時「維拉柏豪」就喺現場，唔知同事件有冇關。英國《每日郵報》表示，基利亞殊有揸過白色Range Rover，不過唔知肇事呢架車係咪佢嗰架。有部份英國傳媒透露，意外發生喺曾效力澳職墨爾本城嘅前鋒羅斯麥高馬克屋企外面，有人話基利亞殊上周六同朋友就去咗麥高馬克屋企開通宵P，唔知係咪咁搞到有意外呢？