一場武漢肺炎提醒大家禍從口入，因為疫症爆發或多或少同食野味有關，而強國代表就示範禍亦可以從口出，外交部幾位智將級發言人就係完美例子，先有趙立堅想屈美國出口病毒，令美國總統特朗普連日堅持將武漢肺炎「正名」中國肺炎。
疑發放假消息
不過，其他發言人繼續為恐天下不亂，捷克日前發現中國啲病毒試劑錯誤率高達八成，另一發言人耿爽早兩日就喺Twitter反咬係捷克方面使用方法不當，但唔知係咪呢個講法如同散播假消息，搞到耿爽個Twitter賬戶（@gengshuangCHN）噚日因為違反Twitter規則被封鎖咗。
根據Google搜查提供嘅頁庫存檔顯示，耿爽Twitter賬戶最後一條推文，係28號晚發佈咗條「聽聽美國民眾的聲音」短片，有疑似美國人批評特朗普應對疫情，中國駐烏干達大使都有喺Twitter轉推，所以八方相信呢個係耿爽真賬戶，不過呢啲留言就變咗賬戶遺言。但正如狡兔有三窟，八方見Twitter仲有另一個耿爽（@SpokespersonSG）賬戶存在，但追隨者少好多，只得唔夠3,000（但其實被封嗰個都係得1.6萬人多啲），如果想繼續向國際獻醜，影響力會差一截囉，耿爽更應該要同時間競賽，因為難保佢呢個賬戶，都命不久矣被封鎖埋。
李八方