自從1月20日開始，衞生署差唔多日日下午4點半都開記招交代疫情，而絕大多數都見到衞生防護中心傳染病處主任張竹君身影，尤其2月初起，唔分平日或假期，張醫生每日都同大家見面，不過張醫生有時似氣若游絲嘅答覆，再加埋一雙疲憊眼神，好多網民都關注佢嘅健康，質疑何解衞生署咁大嘅部門，冇官員可以替佢出嚟開記招，等佢休息吓。
噚日終於有記者忍唔住，喺記者會問張醫生點解冇假放？點解佢嘅上司或同事唔代佢主持記招，等佢可以休息？
張竹君話感謝外界關心，不過其實佢已經唔係衞生署最忙碌嘅職員，仲話衞生署長、衞生防護中心總監等不斷開會，好多同事要負責檢疫中心、港口衞生處大量工作，而佢每日只係比較多留喺辦公室睇個案，「已經唔係工作最長時間嗰個，其他人比我更忙，我係好啲嗰個。」