林鄭月娥真有本事，以飲酒會令人更親密為理由，提出所有8600間持有酒牌的食肆酒吧會所停止賣酒，以特首身份宣佈此事，當然係政府政策啦，點知公佈之後，行政會議頭號資深大律師湯家驊公開反對禁酒令，葉劉淑儀擔心受到司法覆核。唉吔吔，乜特首之最高級顧問要作反呀，唔係在行會商討過，達成共識之後先至公佈嘅咩？最滑稽嘅係，還未正式實施啫，林鄭已打倒昨日之我，話禁酒令只不過係一個建議。
一位資深餐飲界人士為此大發牢騷，對左丁山講：「梗係林鄭一個人發辦、夾硬嚟，未經行會商量就由自己宣佈，聽到全城咒罵之聲就轉軚。禁酒令一事充份證明香港特區行政會議係廢嘅，只係林鄭一個人獨攬大權。」記得一位前高官同左丁山講過：佢地以前開行政會議好嚴肅認真，不容許開會時講風花雪月，照足議程反覆討論、辯論，講好晒，所有行政會議成員就一致對外，不能發生各有各講之情況。依家呢？該前高官聽到嘅係，行政會議差不多係東講西講，似坐埋食早餐開口水會咁款，因林鄭一個人話乜就乜喎。左丁山又問過一位97前高官，佢話在港英政府時期，港督會同行政局嘅決定，不容挑戰，開會時非官守行政局議員若有政策共識而港督唔聽，政策偏離共識嘅話，倫敦方面會要求港督解釋理據，為何拒絕非官守議員意見。
俱往矣，睇見湯家驊第一個跳出嚟反對禁酒令，左丁山為之失笑。笑佢冇用，在行政會議發揮唔到，又笑佢不理自己身份，竟以林鄭反對派樣子見報，唔怪得林鄭寫秘密報告向北京表示香港建制派唔支持佢啦。
呢勻建制派想支持林鄭都唔得嘞，餐飲界議員張宇人今年會受到泛民大挑戰，正想以行政會議成員身份為業界爭取到利益，點知林阿姐虛晃一招禁酒令之後，跟住在上星期五就發出餐廳限制令，只准最多四人一枱，每張枱相隔1.5米，令全港餐廳反晒艇。
星期四中午，左丁山同一位餐飲界人士吃午飯，佢話業內有人想發動反禁酒遊行，建制派人士知道之後，連忙撲火，現在酒牌持有人不分藍店黃店，一致反對林鄭，即使冇遊行，搞司法覆核嘅機會好大。假若香港進一步實施英美中國式關門令，業者反感更大。美英叫食肆關門，都有方案補貼餐廳行業，香港還未有，林鄭如單方面下令，今年九月張議員有可能成為前議員。餐廳一旦全部關門，所有基層人士做嘅職位，清潔洗碗、傳菜、廚房、雜工、侍應等等工人全部返屋企，香港冇失業津貼，佢地只能申請綜援，數以十萬計人士即時失業。原來肺炎肆虐，苦了低下階層，如印度基層所言，不知會病死還是餓死！
言猶在耳，3月27日政府已發出四人禁令，3月28日及3月29日實行，以香港大多數餐廳之小型面積計，即係相等於叫食肆拉閘，呢勻大件事！