【黑鏡線索】
中国日思夜想，發嘅「中国夢」，係改變世界秩序，做世界一哥，「重返」自己幻想出嚟嘅天朝rightful place。於是，每次美國出事，喺中国眼中，就係乘人之危嘅時機。
2008金融海嘯，美國經濟大調整，中国想乘機上位，希望趁美國火燭，拉近相方差距，比美國QE更QE，結果埋下咗国進民退嘅倒車地雷畀自己踩。
到咗2020，中国病毒輸出全球，中国當然又乘乘機機，想趁西方國家滾水淥腳之際，想搶奪國際話語權，宣傳自己嘅「制度優勢」。於是惡人先告狀，一時話病毒係美國傳入，一時又叫人話係外星隕石帶嚟，總之佢既係最無辜，又係最有義氣幫地球捱第一刀，亦都係最有執行力做到閃電「零確診」。
世界對中国客氣 偷呃拐騙由得你
呢啲古仔，呃中国人民可能得，反正雲石柱嘅火神山醫院都有人信，唔信都死撐。但係國際社會，你做到咁肉酸，好難唔令人反感。可能係近廿年大家對中国太客氣，明知你偷呃拐騙都費事踢爆，搞到中国失去咗對分寸嘅判斷。
中国咁難睇嘅食相，令国外生活嘅華人俾人歧視，本來唐人街大媽小粉紅不嬲都已經令人側目，而家終於爆發，朋友住NYC，好驚出街會俾人打，萬一真係焗住要出門口，就包到成隻糭咁，等人地認唔出係Asian。華人俾中国累，起碼都算有少少關連，至於其他亞裔如泰國人越南人都俾人攬炒埋，就真係飛來橫禍。
可以預期，呢一次世界各國對中国嘅social distancing一開咗個頭，有排都唔會逆轉返，橫掂已經擘咗面，反中已成潮流。呢個時勢，任何容易被誤會同中国同路嘅，都要用最大力度劃清界線。利世民話要印返件Tee，大大隻字寫住「Coronavirus is from China. I am not.」，着出街以示同中国割席。
我覺得，再準確再有力啲講，不單止要澄清「Hong Kong is not China」，直頭話「Hong Kong is the antithesis of China」。香港嘅精髓，由始至終，就係中国嘅相反。
所以，當年英國人創造香港，因為同廣州貿易諸多限制，於是就整個free port出嚟。如果同中国一樣，使鬼自己整咁辛苦。
迷失17年 返祖歸宗反送中
所以，中国想要香港主權，因為香港文化完全唔同中国城市，有啲嘢香港做到嘅，中国硬係做唔到。亦都所以，中国吞併香港，結果搞到器官排斥，一国兩制行唔夠一半就宣告破產。一国兩制，只係一個好聽啲嘅名，去包裝將兩樣南轅北轍嘅嘢硬夾綁埋一齊，爆炸係好合邏輯嘅結果。
香港178年歷史，係，曾經有迷失的17年（1997-2014），主流香港認同中国。時代革命，就係香港人痛定思痛，返祖歸宗，正式公開同中国割席，早喺大瘟疫之前，帶領世界反中，令到全世界明白，香港不單止唔係中国，Hong Kong is the antithesis of China。
撰文：宋漢生
fb : sunghsblog