約半年前移居意大利西北部薩沃納省的Rebecca（化名），沒料到會親歷一場前所未見的疫情。她透露，在疫情失控下，意大利政府本月10日宣佈一系列強硬措施，除了禁止市民外出，為拉開社交距離，更規定人與人在戶外要保持一米距離，「除非有必要理由好似返工或者買日用品，其實所有舖頭基本上閂晒，得番超市、藥房繼續開，大家出街要拎住張『行街紙』，每間屋每次只得一個人可以出去，會有警察喺街巡。」
醫學資訊混亂兼缺乏
外國人拒戴口罩一直為人詬病，Rebecca說跟物資缺乏有關，「冇人戴因為本身都唔係個個買到，醫護人員物資就肯定不足，有醫護要自己整（口罩）頂住先。」她指當地人並非不關心疫情，當武漢出現肺炎時，當地新聞已經全日有報道，「但大家只係飲住酒同咖啡圍住講，不過係講對經濟、外交、政治影響，甚至傾係咪生化武器，唔會諗到傳入嚟。」
另一問題是當地資訊混亂，「香港經歷沙士之後，有晒指引，但呢度冇近期經驗，冇人知1比99（漂白水）係乜，佢哋對上一次疫症已經係西班牙流感（1918年），甚至冇一個醫學權威出來講應該點做。」她舉例，當地醫院跟從世衞指引，表示醫護人員在走廊範圍不需要戴口罩，「但呢度有醫護朋友都有懷疑係咪真係唔使。」
然而，她理解當地人以至政府都不希望過度反應或引來恐慌，「但到真係有個案，佢哋仲未警覺，冇人正面去處理，喺awareness呢方面係可以做好啲。」Rebecca曾從事醫護工作，她觀察到幾個造成疫情失控原因：「本身呢度政府一直減緊開支，醫療服務行緊私有化，咁爆疫情一定負荷唔到，而且北部講緊一個城市要500張深切治療床位，全世界任何地方都頂唔到。」
■記者陳珏明