香港演藝界受疫情打擊，鄧月平（Larine）原定去澳洲同沖繩拍攝節目，但要延遲，未知幾時出發，惟有轉搞YouTube channel，籌備ViuTV新劇，佢話：「近期好多人都叫我開YouTube channel，睇吓日常生活嘅我係點，關於我嘅飲食、點樣整蠱人，仲會教大家整嘢食畀男朋友同屋企人，整畀心儀嘅人就整甜品，冧屋企人就可以煲湯。新劇我都進入狀態，隨時ready。」
憧憬愛情
Larine話好想遇到為自己度身訂做嘅劇本：「我特別鍾情鬼片，有生之年一定要拍一部，同埋想談一次甜甜嘅戀愛，至於現實方面，感情睇定啲先啦！我係一個幾難追嘅女仔，物質唔會打動我，我係睇時間考驗，呢段時間以工作為先。」
趁未有工開，Larine選擇行山抗疫，行山她最鍾意影靚相，更教大家唔使P圖影靚相零死角嘅心得，佢話：「影相唔好背光，如果真係背光，就影側面嘅輪廓，咁就得咗！四肢唔好貼近身體，因為會顯肥，仲可以做伸懶腰，拉長手腳。」佢其實唔抗拒P圖：「有時P圖會俾人鬧，但P圖都係想將最靚嗰一面展現，其實管好自己先，唔好鬧人。我P圖好粗略，執完啲色會變晒，頭髮變彎，其實P圖係文化、潮流，唔好太care人哋眼光，世界係你自己嘅。」
多陪家人
Larine又勸大家多啲陪屋企人：「疫情期間唔好去多人聚集嘅地方，最近我去咗郊區摘士多啤梨。唔想出街就趁呢個時間喺屋企陪吓屋企人，香港比較忙碌，好多時候返工未必咁多時間，趁呢個時間同屋企人增進感情。」
撰文：馮仁昭