祖雲達斯門將施捷斯尼近日就向傳媒透露，喺前教練艾基利領軍嗰陣，原來規定咗每逢有球員領紅牌，就要向全隊送份禮物，而喺2018年歐聯作客對華倫西亞嗰場被趕出場嘅基斯坦奴朗拿度（C朗、圖），最後就向全隊送上iMac做禮物。C朗嗰場波因為摸咗謝臣梅里路個頭一吓而被趕離場，施捷斯尼話C朗之後一直都覺得自己冇錯，不過喺嘈咗大約兩個月後，佢都係向全隊送咗部蘋果嘅iMac做禮物。有指艾基利呢條規則亦適用於喺訓練遲到嘅球員，施捷斯尼都係受害者：「我記錯咗訓練嘅日子，最後遲到咗半個鐘，個個都好興奮咁話：『我哋有禮物收喇！』，最後我送咗耳機。」