特首777抗疫工作應做唔做，封關唔止慢半拍仲半桶水，然後引用防疫版「緊急法」，懶係參考外國例子，先限食肆客量，再禁市民四人群聚，但對一班民區議員嚟講，地區工作見街坊係日常工作，難免會聚集多過四人，再加埋呢排差人對民主派區議員特別「關照」，如何唔俾popo針對之餘，又可繼續服務街坊呢？會唔會搞到佢哋因為咁做唔到社區服務，甚至連喺社區做防疫抗疫工作都隨時變犯法？有人計劃以後落區就要「三人限定」，仲有人計劃將社區支援悼念、抗爭be water化，總之唔俾popo有位入。
八方問過元朗區議員張秀賢，佢就即時話「咁我哋三個人做囉，如果有街坊行多兩個埋嚟，咁我哋有個就行開」，但佢話如果做抗疫街站，其實應該有豁免嘅，不過佢同樣都驚今次畀機會政府權力無制衡膨脹，特別借啲意針對黃店，所以都會去區內探吓呢啲舖頭，提佢哋之餘仲會順便做埋選民登記。
選民登記街站縮規模
另一位馬鞍山區議員鍾禮謙就話，有善長本來捐咗物資畀佢，計劃好嘅活動都應該會停，原本會搞嘅大型選民登記街站亦會將規模縮細，唔叫義工幫手，只由自己同助理派表同解答問題，連表格都未必畀街坊即場填。
至於派口罩等防疫物資，因為一向都先網上登記然後分時段去辦事處拎，所以影響較細，但未來周末都會去區內外傭聚集地方，提佢哋要提高防疫意識。
至於聽日又係月底31日紀念日，鍾禮謙過去不時支援區內被捕手足，咁驚唔驚冇得喺警署外面等人？佢就話呢個反而簡單，就係大家be water，到時四人一組就冇問題，但同時聽聞有手足已經喺文宣谷放風，建議呢個月因為疫情關係，可以改吓紀念方式，佢有信心大家會識做喎。
李八方