【本報訊】武漢肺炎由中國禍延全球，雖遠必染。隨住多個國家實施鎖國政策，越來越多身在異地的香港人滯留異鄉。港人Diana本月2日到達南太平洋島國薩摩亞旅行，原定3月21日經新西蘭回港，但因新西蘭封關，航班被取消，四出撲機票失敗。歸港無期，她多番尋求中國領事館協助卻苦無結果，猶如「孤兒仔」。
Diana接受本報訪問，憶述2月初由新西蘭飛往湯加義建教堂，其後轉抵斐濟公幹，3月2日飛往鄰近島國薩摩亞旅行，沒想到旅程後段一波三折。她原本訂了機票，3月21日經新西蘭回港，但新西蘭20日封關，外國人無法入境或轉機，其航班被取消。她改訂3月25日由薩摩亞飛往斐濟回港，航班同樣被取消。
中國領館：口罩有就畀你
她請父親致電入境處求助，入境處職員聯絡Diana，表示無法幫忙，但會轉達當地中國領事館。其後她前往駐薩摩亞的中國領事館尋求協助，職員不願開門，稱當日沒有人上班，着她翌日再來，「我同佢講我滯留，佢就用國語問『咁你想我哋做咩？』佢叫我打熱線，打咗好多次都冇人聽，我搵另一個電話終於有人聽，佢就話『我哋唔會提供住宿，但如果呢度有冠狀病毒爆發，有物資到，就會畀啲口罩你囉，但𠵱家啲物資未到』」對方還說不會主動聯絡她，連個人資料都是她多番要求下才獲記錄。
至3月23日，她得知新西蘭航空將提供航班接載滯留薩摩亞的新西蘭居民，便一大早到航空公司排隊，但因為不是新西蘭人，她足足等了近六小時最終仍不獲購票。她惟有透過網上購票平台trip.com，購買另一班經斐濟轉飛新加坡再轉飛香港的航班，但最終又是全部被取消，trip.com更拒絕退款。
直到3月27日晚，Diana突然收到朋友通知，日本將提供包機接載滯留薩摩亞的日本居民，她次日撲去航空公司查詢，結果包機只願接載日本人與澳洲人，她再次被拒諸門外。
棲身村屋 剩兩周旅費
薩摩亞政府3月21日宣佈進入緊急狀態至4月4日，全市陷入停擺，市中心的街市、餐廳和店舖紛紛停業，街上空無一人，連Diana居住的酒店也要關門。她透過朋友幫忙，到當地人一間荒廢多時的村屋暫住，不過村屋沒有冷氣又多蚊，「窗都閂唔到」，她心急尋找另一處比酒店便宜而安全的住宿，手頭現金只夠花費兩星期。
「𠵱家每日一起身都係睇新聞、睇吓搵邊啲領事館傾、邊度book機票，又要擔心身處環境安唔安全，有冇足夠營養、有冇錢。我唔可以病，我𠵱家好stress，夜晚瞓唔到覺。」早前她還從新聞得知，薩摩亞一所監獄有56名囚犯逃獄，令她更擔心外出。
歸家遙遙無期，眼見身邊美國、日本、澳洲等國遊客都已成功離開，Diana越感徬徨，「佢哋嘅政府某程度上都畀到一啲支援佢哋，可以離開，我的確有少少孤兒仔咁嘅感覺……我明白可能政府都冇可能派一班專機接我一個人走，但如果佢可以提供一啲幫助，畀到一啲方向，起碼個人會舒服啲」。Diana本身是大學兼職講師，擔心若大學復課後仍未能回港，工作或會不保。
入境事務處回覆查詢指，入境處接獲當事人求助後，已即時透過外交部駐港特派員公署及中國駐薩摩亞獨立國大使館了解情況。入境處已與當事人及其家屬聯繫，並會繼續與當事人、家屬、公署及大使館保持密切聯繫。