鐘錶界美女胡曦文（前名胡敏珊）的媽媽於2007年意外墮樓離世，失去摯親的胡曦文曾試過用工作麻醉自己，不過喪母兩年後情緒大爆發，直至到印度和尼泊爾靈修才找回自己，並學會「感恩」，寧波車勸她燒掉與媽媽的合照，學用智慧去悼念親人。前後共花了八年走出喪母陰霾的胡曦文現在對住鏡子學做人，希望每日都滿足和開心。
撰文：比華利
攝影：沈健程
胡曦文在單親家庭長大，胡媽媽母兼父職湊大三名子女，長女胡曦文一直跟媽咪一起生活，母女感情如姊妹，可是胡媽媽於2007年意外墮樓離世，為了忘記喪親傷痛，胡曦文在母親死後兩年不停工作麻醉自己，用忙碌去填滿空虛。
學懂愛自己
胡曦文日前接受《蘋果》專訪，提到母親的墮樓事件，她回想起那段黑暗日子：「媽咪當日走咗，我唔係即刻有事，我不停工作麻醉自己。不過，一睇親電視見到有我媽咪類似意外，我個心會彈咗出嚟。過去好多年有去睇醫生，用好多時間搵位同人分享，足足八年先走出黑暗期。媽咪事件，令我冇晒信心，嗰時忙做嘢，以為自己冇嘢，原來裏邊有啲嘢傷害咗自己唔知。我哋好好感情，每朝大家會錫錫先出門，意外嗰朝早都有咁做，我朝早趕時間化妝出門口，媽咪會走嚟餵我食嘢，由細到大都係咁，一個咁愛自己嘅人走咗，點會唔傷心。人人都會遇到生離死別，我當然唔想上呢一課，媽咪過身，我學到點樣去愛自己多啲。」
最後生意失敗，事業和家庭雙失令胡曦文終於崩潰，她毅然放下一切到印度和尼泊爾靈修，在旅程中，胡曦文突然「開竅」：「印度通街好多窮人，沿途唔停有人乞錢，我問自己點解佢哋笑得靚過我，我人生機會同擁有嘅嘢，佢哋一千分一都冇。香港人呻劏房好辛苦，但我印度個司機同我講佢喺車裏面瞓，一年先見親人一次，我聽完就同自己講，唔可以再怨個天，我失敗有幾大，我永遠唔會再去投訴。媽咪過身，事業低潮，我試過辛苦到唞唔到氣，靈修之旅，我學會人生最快樂一樣嘢就係感恩，快樂唔係睇外面，係睇裏面，外面嘅嘢永無止境。物質啲快樂好短，快樂要珍惜，開心同你有幾多無關，當你滿足就開心，人生係自己畫嘅畫，自己朝早望住塊鏡，你想人哋點對你，你咪望住塊鏡點囉。」
要活得更好
性格堅強的胡曦文最崩潰是密宗寧波車勸喻她把與媽咪舊相全燒毀，她說：「我喊到癲咗，寧波車希望我同媽咪都放下，畀佢去更好世界，一張都唔留得低，用智慧去愛媽咪，我諗咗一晚點去智慧，我要去做佢鍾意嘅嘢，我唔相信佢想自己個女喊，亦唔相信佢想我頹廢，我要令自己有正面思想，活得更好。」現在即使面對逆境，胡曦文都會化負為正，她說：「人真係要捱過，經過磨練先會成功，唔好怕失敗，如果我失敗唔醒就唔識企返起身。」