受武漢肺炎影響，意甲正陷於停擺困局，各球隊都面對冇收入嘅困境，效力意甲祖雲達斯嘅基斯坦奴朗拿度（C朗）喺呢個困境下就展示出球王風範，好順攤願意收少成1,000萬歐元（約8,630萬港元）人工，決定同一班祖記球員齊齊唔收四個月人工，真夠義氣。
全隊連沙利扣四個月糧
祖雲達斯先後有魯加尼等三名球員確診武肺，即使球員14日嘅隔離令已完成，但因應疫情嚴重，球會都未有安排復操日子。上周六球會發官方聲明，表示已同教練沙利及全體球員達成共識扣薪四個月，聲明指：「目前對所有人嚟講都係相當困難嘅時刻，祖雲達斯非常感謝球員們同教練團嘅犧牲。」球會將會慳番由3月起，共4個月嘅球員人工支出，具體細節會喺未來幾星期同沙利及球員商量。
有指今次祖記減薪咁順利，係因為球會隊長基亞連尼喺同球會對話前，已經先同最高人工嘅C朗同老大哥保方等預先商量過，得到幾位有份量嘅球員支持後，先同其他球員交代情況。據知今次扣薪四個月嘅安排，可以為祖記慳番大約9,000萬歐元（約7.8億港元）支出，最高人工嘅C朗就收少咗1,000萬歐元（約8,630萬港元）。
朗媽康復出院晒溫馨相
C朗除咗帶頭減薪，呢位球王仲好有善心，日前C朗已同佢經理人合共捐咗100萬歐元（約860萬港元）畀葡萄牙兩間醫院購買抗疫設備，最近又有報道話佢再向家鄉馬德拉一間醫院捐出五部呼吸機。正所謂好人有好報，C朗媽月初因中風送院，好在經過兩周多治療後，上周已康復出院，不過C朗當時仲隔離緊，令母子未見到面。近日C朗終於可以接阿媽返屋企，目前兩位已經喺C朗避疫嘅葡萄牙馬德拉島豪宅中團聚。C朗上周六喺ig貼出一家人合照，表示對阿媽返屋企感到非常感恩：「好感恩阿媽好番返到嚟，大家要好好照顧你嘅家人同身邊嘅摯愛。」相中可見C朗媽好精神咁坐喺健身器材上面，應該好番好多。
至於意甲幾時甚至有冇機會重開，情況就似乎唔太樂觀。意大利體育部長施巴達科達周日表示，會喺今日提出，禁止進行國內所有體育賽事嘅時間延至成個四月，佢亦透露目前去諗幾時重開賽事係唔現實嘅想法。
