韋斯咸上周六發現有八名球員出現輕微武肺病徵，球隊守將奧邦拿（黑衫）就指英國政府輕視武肺，對疫情後知後覺。呢位意大利中堅話：「唔少英國人起初仲笑意大利對疫情反應過大，所謂嘅緊急狀態都係門面工夫嚟，好明顯佢哋低估咗呢個影響住全球嘅武漢肺炎。」住喺倫敦嘅奧邦拿依然進行緊隔離，佢要同喺意大利嘅女友同家人分隔兩地，非常掛住對方同埋自己嘅父母：「我女友住喺都靈，仲要第二胎預計下個月生喇，但當地好似拍戲啲死城咁。我父母就住喺意大利中部，當地處境同樣好困難。好感激意大利嘅醫護人員，每日緊守崗位去照顧病人。」奧邦拿喺2015年加盟韋斯咸，至今已經效力咗五個球季。