世界球壇以至體壇都因為受武漢肺炎嚴重打擊幾乎全面停擺，不過似乎繼續唔關歐洲國家白俄羅斯事。喺三月中開鑼嘅新一季白俄超聯，賽會冇理歐洲疫情嚴重，依然容許觀眾入場下以正常狀態上演。上周六嘅明斯克打吡戰，由明斯克主場迎戰明斯克戴拿模，主隊可以容納大約3,100人嘅球場，都大約有1,750人入場，入座率超過五成，唔使講幾乎冇球迷會戴口罩，睇見都牙煙。
除咗白俄超聯之外，基本上歐洲所有聯賽都已經暫停咗，各地甚至限制緊市民外出聚集，不過喺白俄羅斯明斯克就兩個世界，球賽繼續進行，賽會有安排入場觀眾先做體溫檢測，但以目前疫情嚟講肯定唔足夠，觀眾席上每位球迷冇1.5米距離，又除晒衫一齊叫一齊跳。場波主隊喺半場先入三球，雖然喺下半場被戴拿模連入兩球追近，但最終仍然保住勝局贏3:2。
