上周四晚上中國外交部同移民局發公告，為阻止疫情蔓延，喺3月28日凌晨零時起禁止所有持有效簽證或居留許可嘅外國人入境。不過，周日就有多家內媒報道，上海上港以包機形式從巴西接走侯克（左）、奧斯卡杜斯山度士（右）等外援返中國，令唔少大陸網民質疑，上港係咪一早收到風要封關。有網友認為今次上港嘅包機行為太大動作，就好似當初武漢預告封城前大量人走佬咁。另外，又有指政府宣佈封關僅一日有多，但上港已經成功安排包機仲喺聖保羅飛抵上海，令人覺得球隊有內幕消息。不過亦有網友指上港因避免出現山東魯能外援費蘭尼喺外地感染嘅情況，所以一早已經決定接走外援，唔係「有人通水」。