【銅鑼灣】香港前游泳代表隊成員、31歲嘅朱鑑然，進軍影壇簽約古天樂旗下，上年仲憑主演嘅《BABY復仇記》殺入東京國際電影節，被冠以新一代型男稱號。而朱鑑然嘅感情生活，上年就爆出同墨西哥混血長腿女模盧慧敏（Amy）拍拖，佢哋感情好似好穩定，更傳出訂婚、預支蜜月等消息，但日前《蘋果》發現朱鑑然已另結新歡，同一位長髮女子去銅鑼灣行某連鎖家品店，疑似同居築愛巢。
日前大約下午5點，戴上口罩、便服打扮嘅朱鑑然被目擊同着黑色衫嘅長髮女子喺銅鑼灣睇家品，佢哋非常專心咁揀毛巾、垃圾桶、杯架、收納箱等家品，女友似乎對貨品頗有要求，精挑細選，又不斷問朱鑑然意見，聽到佢問：「呢個好唔好？邊個好啲？」
鼻痕除口罩
不過朱鑑然似乎行到有啲攰，其間佢仲除低口罩擤鼻水，之後更索性坐喺一堆地毯嘅貨架上休息，而女友就繼續周圍行睇家品，最後買咗幾個白色收納箱，畀錢離開時，朱鑑然輕輕搭住女友膊頭，但係舉動唔算親密。之後佢哋就沿住維園行向天后方向，其間停低自拍，又一度手拖手，繼而雙雙入咗一幢住宅。朱鑑然經理人回覆《蘋果》，指朱鑑然同盧慧敏已喺上年和平分手。