每逢星期二舉行嘅行政會議，會前都有團體或市民喺特首辦外請願，想交請願信畀特首同行會成員，不過因為政府實行減少群組聚集，特首辦噚日發新聞稿，話要暫停行會外請願安排兩個星期。
777接信大細超
其實之前政府已經講咗，特首喺行政會議前會見傳媒嘅安排要改，由以往喺特首辦大堂扑咪，改為去地方較寬敞嘅政府總部地下演講廳，每間傳媒機構嘅代表人數同座位亦會有特別安排，而今次就係因應疫情，以減少人群聚集，所以連3月31日同4月7日兩個行會外嘅接收請願信安排都取消，特首辦話市民可以將請願信電郵去[email protected]或寄去特首辦喎！
不過有民主派人士揶揄呢個安排對佢哋影響唔大，因為以往佢哋請願多數係777唔啱聽嘅嘢，通常777黑面直行直過由其他人代收請願信，所以都好少再去，但建制派就唔同，通常777行過都會傾兩句或打個招呼，但嚟緊呢兩個禮拜就冇機會喇。