黃耀明（明哥）與劉以達組成的達明一派原定前晚舉行相隔三年的演唱會，不過因為武漢肺炎而要延期。明哥大前日已預告改為在facebook唱歌與歌迷見面，他前日兌現承諾開live，但未見劉以達，明哥解釋：「本來想搵劉以達嚟，但噚日先決定呢個live，佢今日個胃好痛，同埋佢住比較遠，要搭好耐車先嚟到，佢又話好早瞓，10點鐘到就瞓，要講聲抱歉。」明哥又表示如果今次live的效果良好，可以等一、兩個星期後再做。
明哥在live中透露公司與蘭桂坊好近，知道該處有不少樂手確診，戥眾人擔心，他說：「好為佢哋擔心，知道佢哋係菲籍樂手，香港樂壇係好靠佢哋支撐，佢哋好多時候都係自由工作者，希望政府幫吓佢哋，好多時啲政策都未必可以受惠。」
憂同行失業
有說法指疫情過後會有復仇式消費，明哥認為聽音樂是不需要復仇，上網繼續支持付費音樂便可，回復正常後又可以買飛入場睇騷。明哥又提到早前演藝發展局補助藝術團體，但個體工作者好難受惠，知道不少教授樂器人士已經沒有工作。
三缺一安全
前日林鄭月娥為防疫宣佈新措施，今日凌晨起禁止群組聚集，明哥今次開live只有大愛同盟的梁奕輝、人山人海蔡一才，他們笑說相當安全。明哥在live結束前感觸說：「希望我哋好快再見，希望香港快啲光復，希望香港快啲康復。」
撰文：翁可人