日職賽會上周五宣佈，將會喺下月初同遊戲廠商EA合作舉行「eJ-League Championship Cup」比賽，由日職球員以足球遊戲《FIFA 20》作賽，比賽將為期一個星期。由於日本國內三大足球賽事𠵱家暫停緊，日職賽會參考早前舉行過嘅「電競版西甲」，決定舉行一次電競日職賽事。呢次比賽搞得十分認真，比賽將會以淘汰賽形式進行，參賽球員將會喺屋企以網絡形式對戰，仲規定喺遊戲入面需要揀日職球隊同球員。今次比賽嘅參加者亦有嚴格規定，賽會將會喺4月4日及5日舉行預賽，各支球隊球員將同參賽嘅隊友對戰，爭奪代表球隊出賽嘅資格，正賽就會喺4月10日至12日舉行。