《二月廿九》短小精悍，短短10集已經完美KO又長又冗的循環膠劇。白髮滄桑的「辰叔」忽然變回後生版現身，形神俱在，怎能不被網友激讚？這天，「辰叔」的真身張松枝，先到電台再來訪問現場，馬不停蹄受訪，他說：「有線（香港開電視）仲話想約我出海訪問！」
各路傳媒邀約，獨欠大台。張松枝2012年離開了效力18年的無綫，決心向外闖，這些年的演出都獲肯定，總好過在大台不被重視。張松枝曾經想過轉行做扎鐵和地產經紀，心動卻未有行動，依然最愛演戲，「跳出嚟搵其他出路囉，我叫做好好彩，跳咗出嚟都叫做有條路畀我行！So far so good都OK啦！」
最緊要人冇事。條條大路通羅馬，演慣二世祖、情夫姦夫的張松枝，近年還有港版宋仲基和港版孔劉之稱，「我希望我嘅成績好似佢哋咁就好喇！」今年50歲的張松枝說。
綠葉王的第二春，開得剛剛好。
撰文：文嘉龍
攝影：仇志德
呢份工唔可以生活到
被網民熱捧的《二月廿九》，對撼大台同時段的內地劇《慶餘年》，不用多說，網民的眼睛是雪亮的。不同時段的《法證先鋒IV》現已人面全非，張松枝其實早在頭兩輯已經當上化驗員，去年重播勾起觀眾對他不少回憶。張松枝說，離開無綫後，已經多年沒看電視劇。
近年大台膠劇特別多？「其實呢方面，我自己都有做過研究㗎！我有時開工會去啲屋邨，都會同啲街坊傾吓偈，其實街坊就係想睇啲清清楚楚嘅劇，唔好要佢哋諗，所以TVB係啱佢哋㗎！師奶班客真係會睇呢啲，你唔可以抹殺咗呢班觀眾囉！但係亦都有另外一班，就係上網嘅想睇一啲新嘢，唔想再睇一啲樣板式劇集，大家各有各做！」
張松枝接連為viuTV拍下的《黑市》和《二月廿九》都成功地被網民激讚，一個演殺人狂、一個演滄桑父親，張松枝的演技絕對不用懷疑，單是最近的神劇效應，就令他的Ig追蹤人數激增一倍有多。回想當初選擇離開無綫，真是義無反顧地博一鋪。
轉眼已經8年，「基本上有起有落啦！出返嚟（離開無綫）之後，我跳去電影圈，可以話係由低做起，有啲角色真係好低嘅，我都係要去做！慢慢可以吸收到我喺電影圈個群組，等大家可以認識到我，自己又要有心去做，慢慢角色（戲份）咪好啲，可以做長啲囉！」
在無綫捱騾仔，根本生活不了。「始終佢都係一個商業機構，佢要照顧住咁多演員，其實忽略一啲人一定有，可能我係其中一個啦；我亦都年紀大喇，又想成家立室生小朋友，我要顧家㗎！冇辦法之下，佢呢份工唔可以生活到……其實唔係好冒險，你喺嗰度做，係一個穩定但係你生活唔到，呢件事唔冒險㗎喎，我只係搵個生活到嘅工作去做，我留喺度都係會唔穩定，個人可能仲辛苦！」
知道真相之後唔開心
在無綫18年，大台人多政治多，不懂擦鞋和埋堆的張松枝，不會日日得閒冇事做走上製作部向監製敲門，「其實藝員部鼓勵你去㖭，鼓勵你上去敲門！你覺得冇嘢做，你咪上去敲門，睇吓監製有冇嘢畀你做囉！但係我唔係咁主動，我覺得我做出嚟有成績嘅，你點會唔用我呢，同埋畀唔畀一個藝員去做嘢，應該係你藝員科去分配，唔係我去主動去搵㗎嘛，如果要我主動去搵，我使乜簽你啫！」
張松枝16歲與朋友到石澳游水，遇上星探發掘而入行，人生第一個接拍的是牙膏廣告，「嗰時我去石澳同一班人游水，游完水去咗一間酒樓食飯，隔籬就有一隊拍廣告嘅crew，個PR見到我，佢畀咗張卡片我，佢話有冇興趣拍吓廣告，叫我上去公司casting！我照住地址就去，見佢哋喺度拍緊嘢，應該冇問題啦，上去casting又OK喎，真係有啲廣告拍！嗰時又興起卡拉OK，跟住就拍MTV，拍拍吓MTV，TVB就開始整一個新嘅部門出嚟，特登要簽一啲演員返去management，我就加入咗TVB！」
加入無綫後，張松枝被安排入讀藝員訓練班，當年1994年第七屆的藝訓班同學有陳展鵬、劉愷威、吳家樂、陳彥行和梁雪湄等人。畢業後張松枝成為經理人部門的「親生仔」，一年後卻被轉合約，變成普通藝員約，越做越冇癮。「我第一套劇好似係《五個醒覺的少年》，我係其中一個古仔，唔係太多戲（份）！我一入去係『親生仔』，簽咗一年之後先係普通演員，因為啲監製唔識你，又唔知你識唔識做戲，冇信心畀一個角色你做，其實你點sell都冇用，你交唔到貨都係冇人知！我又乜都唔識就入咗TVB，你話轉咪轉囉（普通藝員約），你加人工咪OK囉，嗰時幾好㗎，你做得好爆騷，可唔可以加人工呀？得，佢真係加畀你！」
有人工加，但一份普通藝員約，人工多極有限，「可以話同做保安差唔多啦！如果你要結婚一定有問題，如果你一個人慳啲使OK嘅！」張松枝2008年結婚，他的太太是林峯的化妝師，算是半個圈中人，囝囝今年也10歲了，多年來太太都對張松枝的決定全力支持。「大家商量啦，佢又支持我，覺得我得嘅，咪走（離開無綫）囉，反正你試咗之後，你唔做呢行都可以，你可以有其他工作做，一樣可以生活到！」
在無綫最不愉快的經歷，張松枝說：「最唔開心就係你做咗一排比較main啲嘅角色，之後有啲新嘅副導演，打電話嚟叫你去做啲路人甲乙，有時仲要講吓大話，話係監製導演話一定要用你，後尾知道真相之後，唔開心囉！其實只係一個副導演，求其去搵一個人開工，個角色係可有可冇！」唔夠運？「我覺得我好認命，你唔好去怨亦都唔使洩氣，你努力就得！」
終於今次在《二月廿九》的角色甚為吃重。劇中有不少對白更加深得連登仔共鳴，如神聖幾何學會成員就曾經說出「神聖幾何，缺一不可」的對白，和出現「解散學會，刻不容緩」的畫面，夠晒貼地。
神劇有對抗爭運動的隱喻，張松枝都有神比喻，「對於個運動，睇每一件事合唔合邏輯啦，其實你咁大個人，你自己有思想，呢件事根本就冇道理冇邏輯，你又點可以話啱呢？你好難過得到自己！我成日假設一個城市，好似一個社區，你當係屋苑啦，咁多人去投票畀你呢個立案法團主席，每個月去交管理費畀你，你係咪應該去保障呢個屋苑，管理要完善囉，唔係將啲保安員，要畀槍佢哋，或者增加啲武器去畀保安員，唔需要！你無端端將個公園拆咗話要起個水池喎，梗係有好多人唔鍾意，有好多細路仔要玩公園，你起個水池做乜啫，陣間浸親我個仔㖭！我反對你，你又唔鍾意，我想選過第二個立案法團主席，你又話出面個地主唔畀喎！有時啲嘢，我哋縮細嚟諗，咪會知道件事啱唔啱囉！」
張松枝一直有在社交媒體發聲，「唔係發唔發聲嘅問題，係你對件事，唔啱就係唔啱，我係話你做錯喎，我有我嘅觀感，你係做錯喎！你做啱，我亦都會話你做啱，我有po㗎，我有po啲警察去照顧啲婆婆㗎，我話呢個警察真係好好，照顧啲老人家拖佢過馬路。所以每件事我會去睇，你係做得啱唔啱，同邊個錯！」
不用分黃藍，良知話事，「我係比較理智咁解啫，你唔好分黃藍，如果係黃錯，我都會鬧㗎！我唔一定盲撐，你係錯就係錯，我係對件事囉！」運動以來感受最深的一件事，他說：「如果感受最深係開槍啦，對住一個細路仔開槍，我覺得真係……冇必要咁做囉，你有思想嘅人真係會去諗，係冇可能係啱！」
神劇結局帶出「有人犧牲先有改變」的寓意，張松枝說：「有時我會諗大啲，其實係一個香港嘅命運，如果冇呢班細路咁樣（抗爭），可能香港已經死咗一半人，因為有好多內地人落嚟買嘢，𠵱家撞啱個疫情，如果唔係嗰班內地人，聽到香港有個咁嘅運動，唔敢落嚟，我真係唔敢想像有幾多帶病嘅人落咗嚟香港，去感染香港人呢！醫療體系亦都負荷唔到，會有幾多人失救而死呢？所以呢件事係香港嘅命運，佢哋做呢場運動，原來，真係救咗香港！」
【後記】碟聖
港版孔劉的魅力，加上神劇的威力，張松枝的確大受年輕人歡迎，訪問後就輪住與餐廳的少女店主和客人合照，沒有白髮的「辰叔」一樣搶鏡。
更巧合的是，安排小店場地的公關，原來正是當年張松枝為陳慧琳演出《對你太在乎》那首卡拉OK的導演。張松枝是寶麗金「碟聖」系列的御用男主角，他當時總共拍了過千隻卡拉OK，「我一個禮拜開四日工，一日拍三、四首歌，你計吓一個月拍咗幾多喇！我哋斷日計，你拍十首我都係收咁多（錢）！我算係御用男主角，成隻碟仲飛去馬拉拍，幾開心呀！最深印象一定係陳慧琳《對你太在乎》，拍得靚啦，我又可以見到Kelly！」
寶麗金碟聖大戰華納天碟，說起來真是時代的眼淚。
場地提供：青花亭
