今日凌晨開始香港市民就要遵守政府頒佈遏止疫情嘅新規例，除咗可以豁免嘅情況下，唔可以有超過四人聚集，違者最高罰款50,000港元同埋監禁6個月，另外戲院、機舖等嘅娛樂場所都要停業14日。遠在南美嘅秘魯亦有宵禁令，不過曾經效力紐卡素嘅前秘魯國腳蘇蘭奴就被指違反宵禁令，但佢嘅辯稱認真荒謬，話係食晏食得太耐，冇心違反禁令。
話說為咗避免疫情擴散，秘魯當局由月中開始就實施宵禁令，規定國民要喺晚上8點到翌日嘅凌晨5點留喺屋企，禁止外出。不過當地時間上周四，秘魯就有電視台報道家吓做緊國家隊助教嘅蘇蘭奴，因為違反宵禁令所以俾警察帶走。新聞出街之後，蘇蘭奴就回應話自己唔係被捕，只係俾警察帶番去接受問話。
事後知衰公開道歉
究竟點解佢咁夜都喺條街度呢？蘇蘭奴嘅答案就認真不負責任：「其實就係我啲鄰居邀請我哋一齊食飯，大概有5、6個人，都唔係party聚會，但一個唔覺意就食晏咗囉。」蘇蘭奴再補充，話街外有人知道佢喺度，所以知道佢哋咁夜仲未散就通知電視台，之後警察都嚟埋，就搞到咁大件事，不過佢都為所做嘅事感到後悔，向公眾道歉，又指知道大家要留喺屋企都好難捱，健康先係最緊要。
戴巴拿大佬唔隔離隨時被告
另一位南美洲球員、祖雲達斯前鋒保羅戴巴拿，雖然早前就證實咗確診，但係近日佢接受訪問嗰陣就話已經好番唔少，家吓仲可以喺屋企做啲簡單嘅訓練。不過戴巴拿嘅大佬古斯達禾就認真唔聽話，話說因為戴巴拿確診之後，古斯達禾就做咗密切接觸者，所以當佢同女友，仲有女友阿媽一行三人返去阿根廷之後，都要接受自我隔離。不過，古斯達禾同女友只係隔離咗兩日就偷走，阿國警方就已經展開調查，古斯達禾仲隨時會畀人告。
同樣效力祖雲達斯嘅兩位巴西後衞阿歷士辛度同丹尼路雷斯，喺接受完14日嘅隔離證實冇事之後，就因為怕咗意大利嘅疫情猖獗，所以隔離完之後就返咗祖家巴西避疫。
