日職球隊大阪櫻花𠵱家正為改建主場工程公開籌款，球會搵嚟日本牛郎界傳奇人物Roland擔任大使，呢位牛郎界一哥更出錢出力，主動向球會捐款。櫻花舊年開始改建球場工程，將𠵱家用緊嘅長居球技場改建成符合亞冠盃標準，預計明年完工。櫻花將新球場稱為「櫻球場」，並且定出向公眾籌集為數66億日圓（約4.7億港元）嘅資金，至今籌得超過25億日圓。大阪櫻花仲用「奇招」吸金集資，球會上周五就宣佈，今季擔任球會大使、有「牛郎界帝王」之稱嘅Roland決定將早前同大阪櫻花合作推出嘅聯名商品部份銷售金額捐贈至櫻球場籌款計劃，希望藉此鼓勵更多球迷支持籌款。