早前有間銀行嘅員工居家工作期間竟然走去行山，仲要影埋相放上網被人見到，搞到自己周身蟻，不過俗語有話︰「人類總要重複同樣的錯誤」，今次出事嘅就係祖雲達斯翼鋒杜格拉斯哥斯達。
話說哥斯達近日未完成意大利14日嘅隔離期，就返咗去家鄉巴西避疫，返到去祖國後仲要同女友喺泳池鴛鴦戲水，呢對情侶夜晚又遊埋電單車河，似度假多過避炎，佢仲影晒相放晒上社交媒體，鬼咁高調分分鐘會引起球會主席阿涅利不滿。
雖然目前祖記暫停所有訓練，但阿涅利都會每日打電話同球員、教練團聯絡，雖然應承畀部份球員好似希古恩、哥斯達、基迪拉同比真歷等離開意大利，但因為要準備隨時重開聯賽，離開意大利嘅球員來回兩地加埋需要28日隔離，已經令球隊安排方面好頭痕，而哥斯達仲公然晒恩愛可謂火上加油，可能令阿涅利決定將佢賣走。