武漢肺炎喺英國肆虐，「萬人迷」碧咸就搞咗個叫「#ClapForNHS」嘅行動，呼籲大家為英國醫護鼓掌打打氣，成功令成個足球界響應。
面對嚴峻嘅疫情，各地嘅醫護人員都面對住重大挑戰，社會人士除咗呼籲市民留喺屋企唔好出街，減低社區感染風險之外，亦不忘向呢班默默耕耘嘅醫護人員打氣同致謝。碧咸周四晚就身先士卒，搵埋三位仔女一齊拍片，感謝英國醫護人員緊守崗位對抗疫情，仲為佢哋鼓掌致敬。
至於利物浦領隊高普就代表紅軍拍片，向各位英國醫護人員致敬，仲講咗句德文嘅「多謝」，之後紅軍其他球員好似佐敦軒達臣、華基爾雲迪積克等等都有拍片向醫護界致謝，而熱刺嘅艾歷迪亞、洛里斯、李斯特城嘅占美華迪、水晶宮嘅賓迪基等都有響應#ClapForNHS行動，目前英國欖球隊、女子足球隊同好多唔同嘅團體都有響應運動為當地醫護界加油。