【本報訊】港府昨宣佈今晚6時起關閉戲院、party room及健身中心等場地，電影公司高先負責人Winnie曾昨對本報表示：「非常贊成，因為𠵱家其實票房好低，但員工要返工，對觀眾同員工都好危險。至於我排咗嘅片等戲院開返先再重新排期上映，冇乜問題。希望政府對僱主同員工都有補貼。」擁有新光戲院的李居明昨透過助手回覆說：「唔單止戲院，好多範疇都係，希望呢啲措施可以令疫情快啲過去。」
「決策成日唧牙膏」
本報昨午走訪尖沙嘴The One的百老匯戲院，監製兼導演李志倫（Jacky）趁戲院關閉前入場睇戲：「諗住歷史性閂門之前睇最後一場戲，我覺得食肆或者戲院，咁樣封法係攬炒，如果一早封關就唔使suffer得咁緊要。」擔任臨時演員的年叔與女友人亦入場睇戲，他獲悉戲院今晚6時起關閉14天，直言要睇多套：「我唔贊成關閉，對我嚟講戲院係一個紓緩壓力嘅小堡壘，𠵱家閂兩星期係理解同接受，不過影響非常大。」
有三間健身院的陳偉成亦批評：「點解唔一早封關？堵截源頭先最重要，特首成日唧牙膏嘅抗疫決策，對控制疫情毫無幫助，令經濟雪上加霜。」
前無綫藝人陳潔玲經營的兩間party room，上月已暫停營業至今，她指：「我哋party room冇酒牌冇食牌，所以政府嘅抗疫基金暫時都幫唔到我哋。」她又表示，兩間店現每月硬蝕六位數租金，希望政府補貼，或立例令業主免租直至疫情結束。
而香港戲院商會昨晚發聲明，指按政府指令，戲院將由今晚6時起停業至下月10日，合共14天。當中又指疫情對戲院業界造成嚴重打擊，而他們亦推出一連串防疫措施如全院消毒及清潔、隔行或隔位售票等，深信戲院比任何地方安全，無奈疫情令票房屢創新低，戲院仍堅持營業，目的是希望保着員工就業機會。但鑑於疫情變得嚴峻，會配合政府防疫指令暫停營業。
■記者何永寧、王麗春、羅慧敏