2020年全世界經濟衰退，已成定局，討論問題焦點只係經濟負增長達到乜嘢程度。只憑常識，再配合一啲發表咗嘅統計數字去量度，唔使讀過經濟學都會知道，中國、香港、美國以及全世界嘅經濟都患上「肺炎」啦！
香港：8600間有酒牌食肆及會所禁止賣酒，去酒吧唔通飲奶茶或凍檸咩，禁賣酒即都係叫蘭桂坊、駱克道、諾士佛臺一帶夜晚熄燈。有16間位於銅鑼灣恒隆中心嘅旅行社已經熄燈爭取免租，又有兩間旅行社突然停業拖數615萬元，即顯示所有業主都頭痛，唔減租唔得，恒基系之恒地宣佈基礎盈利減退26％，並取消十送一紅股，中華煤氣由慣例十送一改為二十送一，導致股價大跌。雅居樂（3383）去年只多賺5％，今年首季銷售額減少近五成，餘下日子難以追回營業額；恒大（3333）發盈警；招商銀行預告貸款逾期不還數量大升；其他如九倉話大勢已去；到酒店大堂一望，搵十個遊客都難。2019年已經杰，2020年仲淒慘，相信恒生指數成份股每股盈利（2020年）一定下跌不少，譬如每股盈利100元，股價值1000元，P/E只係10倍似乎幾抵噃，但當盈利跌三成至70元，要維持P/E 10倍，股價就要跌到700元，今天買股一定要有長揸嘅心理準備。
中國首季經濟數字幾嚇人：今年頭兩個月工業生產下滑13.5％（去年12月上升，升6.9％），固定資產投資下跌24.5％（去年12月上升11.8％），民營投資下跌21.4％，製造業下跌31.5％，零售下滑20.5％，其中汽車銷售額下跌37％，內地有人講下半年可以追回，真係信五成都要再打五折，因為中國現時復工率約五成左右，一復工卻就碰到歐美肺炎疫情大大惡化。各國禁公眾集會及盛行居家隔離不出外，點消費呀，於是見到文匯報3月24日報導：「美疫襲撤單，港企恐掀倒閉潮」！一如左丁山在本欄講過，上游停航，下游淤塞，結果就係中國今年之經濟增長可能好低，如果有增長，都要靠北京抄溫家寶舊辦法──大水慢灌。中港經濟大大不妙，美國，歐洲因航空、酒店、旅遊、餐飲各勞工密集行業叫停，必令失業人數大升。美國最壞估計係失業率達30％，GDP跌50％（第二季，聖路易斯聯儲銀行估計）。高盛估算全年經濟萎縮3.8％，大摩估第二季消費跌31％，失業率12.8％……，呢啲數字十分得人驚，特朗普不能接受，故此據報佢已經要廢除隔離禁令，希望復活節有人潮湧上大街消費，挽救經濟。中美經濟一齊唔掂，歐洲還亂成一片，環球經濟點會好，點會支持到股市向上？迷信聯儲局撥無限QE救市者慎防輸完又輸，美國政府撥二萬億美元派予企業及普通人只能暫時止咳而已。