現年41歲的楊思琦去年驚爆大肚兼已嫁圈外老公,上月誕下囝囝「豬豬」,昨日她在Ig分享了她跟囝囝及長女Krystal一同拍攝的寫真靚相,只見她抱着囝囝一副有子萬事足的樣子,不過圈外老公依然無影,相當神秘。近日武漢肺炎肆虐,問楊思琦可有擔心帶BB出外影相有風險?她昨日回覆《蘋果》時說:「有擔心㗎,始終BB咁細個,但好想同佢影吓啲啱啱出世相,好難得,BB每日大都有好多唔同變化,好想影吓佢個BB仔樣,佢第日大個可以睇返。」
楊思琦表示攝影師一早先把影樓消毒,攝影師及在場工作人員皆戴上口罩,因此她相當安心,她說:「之前家姐唔喺香港出世,未有機會影呢啲初生寫真,細佬喺香港出世就方便好多,可以安排,我陀緊佢時已好想等佢出世同佢影輯BB仔靚相,終於同佢影咗,效果好滿意。」
採訪:嵐山