前曼聯翼鋒拿尼近日就應美職聯訪問選出心目中最佳嘅五人足球陣容，其中同佢一齊效力過士砵亭同曼聯嘅基斯坦奴朗拿度（C朗）有份入選，但拿尼竟然話以前係佢教識C朗點樣插花同扭波咁話，話晒對方係佢師兄，球壇成就又高過佢，睇嚟似講笑多過認真。
拿尼家陣已經去到美職聯打滾，踢緊奧蘭多城，似係步向退休之路。佢早排接受訪問嗰陣，被邀請挑選一個佢心目中嘅五人足球最佳陣容，佢有揀昔日師兄C朗，其餘四位都係佢昔日效力曼聯同葡萄牙國家隊合作過嘅球星，包括迪基亞、迪高同般奴艾維斯。原本拿尼都想揀自己入隊㗎，但工作人員就話由於佢要負責做教練唔可以落場，拿尼最後就補選咗曼聯一代中場史高斯入選。
當年長居C朗後備
不過，訪問中當佢點評C朗嗰陣，竟然爆料話C朗以前都係跟佢學嘢咁話：「C朗嘅技術、花式扭波都係我同佢一齊效力士砵亭青年軍嗰陣教佢嘅，佢喺我身上學到好多嘢，佢知道嘅。」拿尼呢番「C朗踢法似我」嘅言論，相信好多人聽完都O晒嘴。
有番咁上下波齡嘅球迷都應該記得，拿尼當年加盟曼聯嗰陣真係同C朗似到十足十，腳法同C朗初出道時一樣好花巧，後尾連射罰球嘅準備姿勢都幾乎一樣，但佢當年基本上都係做C朗後備，直至對方轉投皇家馬德里，佢先有機會躋身正選，不過大約2、3季後已經慢慢失寵，結果當費格遜一榮休，佢已經冇碇企，雲高爾一上台就將佢外借咗返母會士砵亭，一年後就正式離隊去咗土超嘅費倫巴治，之後又去過華倫西亞同拉素，雖然後尾又返過士砵亭，但始終冇留喺母會養老，上年轉戰美職聯。比起家陣仲喺祖雲達斯踢緊、大佢一歲嘅C朗，兩人嘅球員生涯同成就真係冇得比。
葡國森巴多扭波王
提起上個世代嘅球壇「插花王」其實都有好多，葡萄牙除咗C朗同拿尼之外，仲有哥利斯馬都係扭到識飛，𠵱家佢就效力緊土超嘅卡森柏沙。至於同葡萄牙好有淵緣嘅巴西亦都有唔少大家熟悉嘅「濕手巾」，就好似丹尼臣同羅賓奴，而喺90年代末期仲有森巴鬼才查明夏，拉科魯尼亞可以喺99/00球季贏得球會史上首個西甲冠軍，佢嘅功勞都唔少㗎。
