【狗仔隊爆料】李彩華（Rain）去年2月宣佈同內地男友黃彥書（Eric）結婚，Eric被指身家豐厚，喺內地做鋼鐵生意，擁有唔少物業，而家族成員就喺中央政府工作，家族更擁有逾11億元嘅四合院。但去年12月Eric被人貼追債街招爆料，話佢曾於2009年結婚同有小孩，涉騙財又騙色，Rain回應係「得啖笑」。
揸名車出入
近日武漢肺炎全球肆虐，好多藝人工作被叫停，Rain就留港避疫，日前下午，《蘋果》喺大坑見到佢揸白色名車，同老公去渣甸山附近嘅超市。當時Rain着住黑色衞衣同牛仔褲，𡥼住近9萬元嘅名牌手袋，而Eric就着黑tee同牛仔褲裝束，佢哋都有戴上口罩防疫。
Rain夫婦喺超市內不時蹺手又互相攬腰，Rain間中更會向老公撒嬌，非常恩愛似足「連體嬰」。佢哋主力買日常生活用品同食材，而且佢哋都好尊重對方嘅意見，每揀一樣嘢都有商有量。Eric全程推住手推車，埋單後就由Eric負責拎住兩大袋貨品，之後Rain再次負責揸車，直接返大坑愛巢。兩公婆生活如常，住豪宅揸靚車，似乎未受追債傳聞影響，而佢哋住嘅1,200呎單位，翻查資料係Rain於2012年以1,600萬元買入。
齋睇冇消費
前日，Rain一支公以輕便打扮去銅鑼灣利園商場，戴上口罩嘅佢齋睇冇消費，其間走去商場客戶服務處詢問。之後佢去保良局附近一棟住宅，管理員向佢打招呼，似乎Rain不時出入上址。