呢日中午時分落街去食午飯，一陣風吹埋嚟，面部有啲涼意，先知道自己唔記得戴口罩，於是轉頭上寫字樓攞番塊口罩，點知已畀人抄牌，乃係老闆S，佢呼喝一聲：「左丁山你死，唔戴口罩出街，因住染病呀。」啋，邊有咁易，不過今時今日，香港人唔戴口罩在街上行走，確會惹來懷疑目光，令人好唔自在，既然見到老闆S，於是講番兩句：「你又去邊度食飯呀？」老闆S居然講：「出來散吓步，等陣買外賣返公司食。」乜咁小心呀，去慣會所嘅噃，何以買外賣唔叫辦公室助理去買？老闆S細細聲講：「自己對手去攞好啲」。哦，明白嘅。去翠華買外賣？老闆S又細細聲：「去China Tang呀！」啊，咁又高幾級。
下午三點鐘，好奇八卦心起，打電話畀老闆S：「點解你唔去會所呢？你慣㗎！」老闆S：「依家得閒同你講，昨晚我去南區乜乜會所，見有大把講英文青少年，一望就知佢地係自英國回流嘅中小學生，有職員話畀我聽，自從大把香港學生自英國寄宿學校回港避難後，會所多咗好多年輕人入嚟，大概係政府宣佈隔離英國回港人士之前趕返嚟嘅。南區多富翁，富翁仔女多去英國讀書，故此南區會所多年輕人，明白冇？你知乜嘢叫做倒灌嘅啦，我依家實行禁足會所兩個星期，等啲自外地回港人士隔離吓先！」
勢估唔到高級人士有高級「恐懼」，不過睇一啲報紙資料，回流染病確診者不少住在豪宅區域，唔到你唔怕。根據報紙刊登資料，由3月12日至3月22日止，新確診有188宗，其中148宗係外遊人士，7宗係與外遊或回流人士有密切接觸嘅市民，即係該上述188宗之中，155宗與外遊或回流人士有關，佔總數82.5%，比例極高，目前香港有第二波疫情爆發，並非本地防疫系統有破敗，而係港人自外地帶回病毒，故此正確對策係嚴格執行隔離14天決定，回流香港人一到達赤鱲角機場就要送隔離管制，不得有例外。有醫學專家建議全港食肆酒吧關門，以目前數字睇，並非完全對症下藥，本地食肆已經人客稀疏，隨時執笠，如果要佢地硬性立即關門，恐怕係犧牲十幾萬人嘅職位而只能阻截二三十宗確診。因各國開始實施鎖國禁飛，香港學生自外爭相回港高潮漸過，愈來愈少人在機場出現，照計倒灌現象會陸續降低，香港人鎮靜一啲！
（按：自英國、美國、愛爾蘭、埃及來港人士，自3月19日零時零分開始，須家居隔離14天。）