香港星級時裝設計師姚子裕（Kev）向來不乏明星捧場客，前年因在社交網站呻爆女星抱怨其作品是「垃圾裙」，矛頭直指苟芸慧，令他成為新聞主角。姚子裕當時只想捍衞自己的設計，未料會引發是非不斷。再談「垃圾裙」風波，他承認當時「反應過度」，現在已學識「收掣」。白手興家的他坦言對自己要求高，曾試過壓力爆煲患上抑鬱，胡思亂想自己的喪禮是時裝騷。
撰文︰梁錦雯
攝影︰沈健程
今年34歲的Kev從事本地婚紗時裝設計，前年苟芸慧在婚禮穿上由Kev贊助的「美女與野獸」主題晚裝裙，事後傳出她向傳媒表示「晚裝是自己設計的」，還私下向人抱怨Kev的設計是垃圾。之後Kev在社交平台不點名「放負」，捍衞自己設計。重提「垃圾裙」風波，Kev已經完全收火：「當時對設計偏執，想保衞自己嘅美學，冇諗過發生咁大件事。」問到「垃圾裙」一詞是否刺中神經？Kev表示：「任何人都係，好似一個歌手，有人同你講唱緊垃圾歌會開心嗎？可能係overreact，又係一場課，要學識收掣。經一事長一智，個決定係自己嘅，就算話好後悔都做唔到啲乜。」
問到會否怕了與藝人合作？他說：「藝人都係人，都係客人，雖然佢哋publicity好大，着起我嘅設計會好有影響，但我本住着靚佢係我首要任務。」Kev表示歡迎與苟芸慧再合作：「我格言係一路撞板一路學，最緊要撞我唔死。如果藝人再搵我，我welcome再合作，我都係發吓牢騷。」
一條友做起
Kev少年時愛畫美少女戰士，在一屋女人的四姊妹家庭玩公仔煮飯仔遊戲而愛上整公仔衫，因父親是公務員獲保送到英國升學，Kev當時聲稱自己讀設計，實情是瞞着父母讀時裝。畢業後他返回香港，在利豐做產品設計兩年，之後在火炭工廈成立工作室，買衣車一個人做時裝，更試過犯法睡工作室梳化。捱了三、四年，Kev上商台少爺占的電台節目，趁機在大氣電波找投資者，終於與一個內地有婚紗工場的投資者合作，事業突飛猛進，但合作了一段日子就拆夥，更要將買樓首期去開舖及打官司。
出現情緒病
Kev在2015年與胡杏兒合作開婚紗店兼進軍內地市場，事業再上高峯，但情緒卻走向低谷。2018年他在上海開舖時情緒出現問題：「一直畀好大壓力自己，諗到有一日人哋唔需要你嘅設計，我就嚴重失眠，要去做催眠療程，後來情緒崩潰，仲有諗過衝出馬路。我會諗呢個moment衝出去，我嘅喪禮會唔會係一個fashion show？」