繼一名駐守北角警署嘅48歲男警確診武肺後，一名22歲駐守深水埗警區的女警前日亦中招，唔少網民「十分關心」警員健康，關注仲會唔會有更多警員中招，咁啱警務處長鄧炳強早幾日去咗最近有剪接師確診嘅now新聞台受訪，雖然該座大廈一早貼咗通告，講明所有出入該處嘅人士都必須戴口罩，但據聞PK鄧當日冇戴罩喺now新聞部行嚟行去，而佢受訪期間亦冇戴罩，唔知會唔會被武肺選中？
八方前日問過警務處，PK鄧冇戴罩喺now新聞台受訪後，擔唔擔心染上武漢肺炎，以及有冇計劃接受病毒測試，以確保冇染疫。警方發言人回覆時冇具體回應，只回覆：「處長健康良好，感謝貴報記者對他的關心。」
其實八方唔係關心PK鄧，只係憂慮佢社區播毒，事關PK鄧冇戴罩現身人多場合都唔係第一次，好似之前冇戴口罩同一眾警隊高層及明星足球隊成員聚餐、唱K、搭膊頭。PK鄧事後曾承認「對社交距離的敏感度確實不足」，但未有就此道歉；知恥近乎勇，相信唔係個個自稱「忠誠勇毅」都識嘅。