愛嘅反面就係恨，越深愛過恨意就會更加深，用嚟形容法比加斯同阿仙奴球迷之間嘅關係最好不過。當日橫空誕生嘅法比仔，一度係廠迷嘅寵兒，仲做埋隊長，但效力球隊八年後毅然轉投巴塞隆拿，傷透唔少廠迷嘅心。不過，近日呢位前隊長接受訪問時就表示，其實出走都係對當時嘅阿仙奴恨鐵不成鋼，決定離開之時，感覺到隊入面只有尹佩斯同拿斯尼喺能力上係夠班。
法比加斯喺2003年由巴塞隆拿青訓過檔阿仙奴，趁前隊長韋拉喺05年離隊繼承咗佢件4號波衫兼快速上位，但到11年決定走人返巴塞。近日佢接受著名廠迷網站Arseblog嘅訪問，暢談自己當年喺阿仙奴嘅歲月，八年槍手生涯就只係捧起過足總盃。訪問之中，佢就大爆當初點解離隊，「我當時係球隊隊長，背負住好大壓力，我曾經因為輸波而喊同瞓唔着。但係有啲隊友輸波後仲係有講有笑，只係諗比賽完去邊度玩，令我覺得好失望。」法比之後再講，呢種情況唔係一時三刻，而係持續咗幾年時間，所以令佢好煎熬。
豆腐防線失英聯盃後走人
同時間，佢又對球隊當時嘅陣容唔係幾滿意，覺得隊內夠班嘅球員唔夠，而且買人又唔多積極，「喺我離隊前2、3年，隊入面就只係得尹佩斯同拿斯尼兩位球員喺技術同心態上同我差唔多。我知道球隊曾經有機會簽入幾個有料嘅球員，但最後冇成事，令我開始萌生咗離開嘅諗法。」
既然法比仔講到咁，咁我哋又睇吓當年阿仙奴嘅陣容。10/11球季歐聯16強主場贏巴塞2:1一役，都可以話係近年兵工廠歐聯經典一役，當日正選陣容有佢、拿斯尼同尹佩斯三人，中場亦有冒起嘅韋舒亞，同埋其後都去咗巴塞嘅桑治，都尚算唔錯。不過，後防線就真係一般，四人防線除咗啱啱加盟嘅哥斯尼外，其餘三人包括中堅佐羅、左閘基捷基治，右閘伊保爾，加埋年僅20歲嘅施捷斯尼，就畀人一種危危乎嘅感覺。結果當年呢條防線喺英聯盃決賽鬥伯明翰嘅尾段就犯下大錯，將冠軍拱手相讓對方，或者都加速咗法比離隊。
比堤讚今季紅軍更勝04阿仙奴
講起舊事，另一位槍手名宿比堤近日評價今季嘅利物浦，定係03/04不敗嘅阿仙奴更強嗰陣，佢就幫理不幫親，認為今季利物浦令人印象深刻，睇佢哋比賽會有一種前所未有嘅感覺，唔知一眾廠迷聽完又覺得點呢？