警方話中西區區議會主席鄭麗琼涉煽動謠言，咁如果拍片協助民建聯嘅陳學鋒煽動謠言呢？又如果拍片嘅係警員呢？係咪煽上加煽？
話說噚日民主黨許智峯、甘乃威等人去咗葵涌警署，抗議警方以言入罪拘捕黨友鄭麗琼。同日有人影到喺警署門外，民主黨甘乃威疑似數錢交畀許智峯。事後民建聯區議員陳學鋒即刻好似執到寶咁，上載影片兼留言：「許智峯，示威完收錢都唔好咁揚啦！ 」許智峯向八方大叫冤枉，話當時只係籌旗畀保釋金，會對造謠嘅陳學鋒保留追究誹謗嘅權利！
網民寸只有收錢示威觀念
唔知陳學鋒係咪平時見慣人收錢請願啦，一見到抗議現場有錢銀交收，就一口咬定係收錢示威。許智峯稍安毋躁，正如有心水清嘅網民話：「藍絲成日收錢遊行，你同佢講冇錢收佢點會信？」
網民仲發現，條片嘅拍攝角度可疑，明顯由前方高位影落嚟，咪即係警署入面？許智峯同八方講，佢都好肯定條片係警員影嘅，因為抗議期間，有警員毫不掩飾喺高處監視兼拍片。
民主黨facebook事後亦出post質問：「咁算唔算煽動謠言？警察犯法拉唔拉呀？」若果條片真係警員拍攝，咪即係警方拍片協助陳學鋒煽動謠言？知法犯法，罪加一等喎。對於有人製造假消息，意圖抹黑民主派人士，八方深表遺憾。唔知平時大大聲譴責造謠者嘅警方，今次又打算將個龍門搬去邊呢？
李八方