武漢肺炎疫情近期喺歐洲多國大爆發，球圈有唔少現役同退役球員，甚至球隊老闆確診嘅個案，令體壇蒙上陰影。而近期有唔少球星都發揮自己嘅影響力，捐款幫忙抗疫，其中「慈善球王」基斯坦奴朗拿度（C朗）就同經理人佐治文迪斯捐出100萬歐元（約840萬港元）畀葡萄牙三間醫院改建病房。同時，另一位球王美斯都捐出100萬歐元畀西班牙同阿根廷嘅醫院，為善不甘後人。
各捐100萬歐元予醫院
早前好多傳媒都報道過，C朗打算將自己旗下嘅CR7酒店暫時改建為醫院，畀武肺確診病人入住，不過之後就證實咗係假新聞。但家吓喺家鄉馬德拉島自我隔離緊嘅C朗都冇對疫情坐視不理，最近路透社報道就指C朗同埋經理人文迪斯就向葡萄牙里斯本大學醫院兩間分院，同埋位處波圖嘅聖安東尼醫院捐出100萬歐元，用於增加病床同埋改建深切治療病房，另外仲訂咗大量防護衣同口罩畀醫護人員，果然不負「慈善球王」之名。
而另一位球王美斯近期都喺自己嘅面書專頁分享有關武肺嘅資訊，希望大家都可以多啲了解疫情。按周二嘅數據，西班牙已經有近40,000人確診，近2,700人因為武肺而過身，喺歐洲入面嚴重程度只係僅次意大利。所以，近日呢位巴塞10號就效法前巴塞教頭哥迪奧拿，向巴塞隆拿嘅醫院同埋家鄉阿根廷醫院捐出合共100萬歐元。雖然美斯未有向傳媒公開自己捐款，但係嗰間巴塞隆拿醫院就喺Twitter上面多謝美斯捐助。
羅拔仔偕拜仁戰友共襄善舉
除咗兩大球王之外，唔少球星都共襄善舉，好似德國咁，拜仁嘅甘美治同哥列斯卡就聯手搞咗個「#WeKickCorona」嘅運動，希望籌款畀德國國內嘅醫療同福利機構。其中拜仁前鋒羅拔利雲度夫斯基同埋太太就一人捐咗50萬歐元出嚟。除咗拜仁球員之外，好似曉姆斯、祖拿斯赫達，高路斯達文等嘅非拜仁球員都捐款，截至周二活動已經籌到超過250萬歐元。