香港武肺確診個案持續增加，噚日《蘋果》收到消息指無綫娛樂新聞台有兩名員工疑似中招，經檢驗後其中一人呈陽性反應，立即同上級匯報，到噚日再喺公立醫院檢查結果呈陰性。
消息傳出後無綫內部人心惶惶，人事部發電郵交代有員工接受病毒檢驗，結果為陰性。但為安全起見安排全組20名同事進行檢測，而辦公室亦進行全面消毒。傳聞指配音組有4名員工正接受隔離外，亦有PA組做完訪問後發現受訪者確診，已即時安排接受病毒檢驗結果均為陰性。消息喺連登亦有廣傳兼有疑似員工流出相片，並表示：「E-NEWS入面有人確診，返E-NEWS同事留起（喺）pool等待通知，不要進入E-NEWS房。」
煲劇減少出門
不過，林夏薇同陳展鵬等噚日依舊出席遊戲節目錄影，薇薇表示最近少出門，因沉迷煲韓劇《愛的迫降》外，就忙為三隻狗狗安排節目：「佢哋一日要散兩三次步，噚日就試畀佢哋喺跑步機上行，好彩佢哋唔抗拒。」而前晚於Ig上載女兒慶祝1歲生日照嘅陳展鵬，談到近日於淘寶買車胎後貨不對辦，佢話事情已告一段落：「吸取咗經驗，呢啲比較大件嘅貨好難運返內地，𠵱家全球物流都比較亂，過一排再講。」
撰文：馮仁昭