時代抗疫，人人有責！大家唔想武漢肺炎個案繼續增加，互相呼籲減少外出，但留喺屋企除咗辦公，亦多咗好多空閒時間，大家於是要搵方法消磨，咁啱任天堂Switch版嘅《集合啦！動物森友會》近日開賣，點知呢個遊戲娛樂，竟然成為大家維持抗爭意志嘅育成場所。
呢個本身令唔少機迷期待嘅遊戲，背景係玩家移居去無人島開始新生活，仲係隨心所欲生活嗰種，完全係香港真實一面嘅另一極端，玩家需要利用島上嘅自然材料DIY唔同道具、家具同必需品，又可以去其他人個島探訪。由於遊戲畀玩家自行加入圖像設計同音樂，《願榮光歸香港》自然係大熱之選，唔少島民用嚟歡迎訪客，同時亦有大量抗爭文宣素材喺網上提供，令到虛擬世界嘅小島成為另類連儂牆，四圍都有「光復香港 時代革命」旗，甚至有埋「三萬，thx」海報。
喺遊戲度整連儂牆唔使驚俾Popo襲擊，有玩家仲發揮創意，將777個頭像同習大大頭像加入遊戲，點解要咁做？因為有人將佢哋放喺地下，然後拎掃把同地拖一齊「打小人」，又或者貼去幅牆度，當然唔係當佢哋係偶像，而係喺前面再放支蠟燭，代表乜？你懂的！