受武漢肺炎疫情影響，英超最快都要4月30日先至可以重開，呢個球季好難如期完成，連帶下季嘅備戰工作亦受到影響。《每日郵報》就報道，英格蘭球壇正研究能否延長轉會限期，等各隊有足夠時間調整陣容。今夏嘅轉會窗原定喺7月1日開啟、8月31日關閉，但受到武肺影響，轉會限期有機會押後到明年1月底屆滿。由於英超球隊受到國際足協（FIFA）嘅轉會條例規管，當局已成立一個特別小組研究相關安排。由於部份球員嘅合約會喺6月30日到期，但到時球季可能仲未結束，呢個小組就會負責處理有關事宜。FIFA話有關工作已經展開，仲會充份諮詢各地足協、聯賽賽會、球會同球員意見喎。